Segun Comision Economico pa America Latino y Caribe (ECLAC/CEPAL) Dominica, Antigua & Barbuda, Guyana y Grenada lo ta e paisnan cu lo ta lidera den crecemento economico den Caribe na 2020. ECLAC a haci e pronostico aki den nan publicacion “Preliminary Overview of Latin America and the Caribbean for 2019.”
Dominica, Antigua & Barbuda y Grenada ta parti di e union monetario Eastern Caribbean Currency Union (ECCU) y segun ECLAC e union lo logra ocho aña consecutivo di crecemento economico positivo, cu un averahe di crecemento pronostica di 3,9 porciento na 2019.
ECLAC: “E prestacion robusto di e sector turistico, como tambe e programa di ‘Citizenship by Investment’ (CBI) y actividad di construccion impulsa pa inversion publico, tabata e motornan principal di crecemento di GDP den henter ECCU na 2019.”
Inflacion dentro di e Union a baha di 1,3% na fin di 2018 te na 0,7% na mita di 2019 , mientras cu vivienda, servicio di utilidad y prijs di combustible a mustra tendencia di baha.
Pa Guyana e Comision ta observa “actividad economico cu ta continua acelerando, anticipando e boom di petroleo cu ta spera pa 2020.”
Deficit fiscal lo deteriora sí por lo pronto, a base di un aumento den gasto (16%) cu ta mas halto cu e aumento fuerte di entrada (11,3%).
ECLAC: “Na 2020 economia (di Guyana) lo expande substancialmente, cu 85.6%, ora cu produccion di petroleo cuminsa na december 2019. Hasta e sectornan cu no ta petroleo lo crece cu 4,8%, debi na un ‘spill-over effect’ di sector petrolero.” E cambio drastico den economia di e pais a causa tambe un aumento di prijs di cuminda di cerca di 7% den ultimo aña.
