(CaribbeanNewsNow) – Barbados – Caribbean Development Bank (CDB) ta proyectando un crecemento economico di 2% na 2018 pa e region.

Esaki ta un retorno na cifranan positivo di aña pasa, durante cual e region a experimenta un crecemento general di  0,6 – 1%, a pesar di e devastacion cu e temporada Atlantico di horcan a causa.

Director di economia na CDB, Dr Justin Ram, a bisa cu tur pais miembro di CDB ta anticipa pa contribui na e desaroyo positivo aki. “Esaki ta principalmente bao di impulso di regreso na crecemento diTrinidad & Tobago y un aumento di 2.3% na Jamaica, cu ta representa 20% di e GDP regional. E cifra mas halto di crecemento ta anticipa na Anguilla y Dominica,reconstruyendo economia despues di e daño causa pa e horcannan di 2017. Antigua & Barbuda y Turks & Caicos tambe ta spera di tin crecemento fuerte.”

Ram a hiba palabra durante e conferencia anual di noticia di CDB dia 7 di februari ultimo. El a nota sin embargo, cu aunke e retorno na crecemento ta duna curashi, Caribe ainda ta keda atras compara cu otro estadonan chikito den desaroyo. Den e region, crecemento a yega na un averahe di 0,8% desde 2009, compara cu un averahe di 4,8% den otro grupo di pais.

E director di economia a bisa cu pa e paisnan di Caribe por sigura crecemento y desaroyo sostenibel y incluyente, ta necesario medida pa mehora capacidad di reaccion. Durante su presentacion na medionan, Ram a recomenda un cuadro cu por yuda paisnan aumenta nan capacidad di reacciona riba situacion adverso. Esaki ta basa riba cuatro pilar: capacidad di reaccion macro economico; productividad y competitividad; desaroyo humano; y capacidad di reaccion ambiental.

“Cualkier blueprint pa aumenta capacidad di reaccion den Caribe mester tuma na cuenta tur e elementonan clave identifica den e cuatro pilarnan. Adicionalmente nos mester sigura cu nos ta considera integracion regional y igualdad di genero; temanan transcendental cu ta apoya y fortifica e cuatro elementonan. Ta importante pa crea capacidad reactivo den tur cuatro area, cu ta interconecta”, Ram a bisa.

Pa loke ta accion di maneho specifico, Ram a nota cu na nivel macro economico, reglanan fiscal cu ta encurasha gobierno pa spaar mester keda implementa; y mester introduci limite pa debe compara cu GDP. El a recomenda tambe pa paisnan adopta reforma cu ta facilita haci negoshi, y di e manera aki establece e ambiente pa crecemento dirigi pa sector priva. “Miho capacidad di reaccion na nivel ambiental ta significa miho cumplimento cu norma mas estricto di construccion, y e desaroyo di mercado di seguro di indemnisacion.”