Comsion Europeo siman pasa a publica un informe den cual ta menciona e paisnan cu ta forma riesgo pa nan sistema financiero, entre nan tambe pais di e region di Caribe. Bahamas, Panama, Puerto Rico Trinidad & Tobago, US Virgin Islands ta entre e paisnan riba e lista. Afghanistan, Samoa Americano, Botswana, Corea di Norte, Etiopia, Ghana, Guam, Iran, Irak, Libia, Nigeria, Pakistan, Samoa, Saudi Arabia, Sri Lanka, Siria, Tunisia, y Yemen ta completa e lista.
Gobiernonan individual di UE y parlamenarionan lo mester firma ainda, pero si e keda acepta, esaki por ta un problema pa e banconan dentro di UE cu ta maneha pago relaciona cu e paisnan marca. Esakinan lo mester impone ‘due diligence’ aumenta riba tur transaccion di UE pa e teritorionan aki y vice versa.
E informe di UE ta bisa cu e lista a ser estableci a base di un analisis di 54 hurisdiccion prioritario di cual UE tabatin investigacion constante den ultimo añanan, prepara pa e Comision den consulta cu e estadonan miembro, y publica na november aña pasa. E paisnan analisa ta cumpli cu por lo menos cu un criterio, cu ta: cu nan tin un impacto riba integridad di e sistema financiero di UE; cu nan ta bao revision di Fondo Monetario Internacional como centro financiero ‘offshore; y cu nan tin relevancia economico y lazo economico fuerte cu UE.
Estadonan Uni a reacciona caba riba e lista nobo di UE a traves di un comunicado di departamento di Tesoro y na nomber di nan teritorionan USVI, Puerto Rico, Samoa Americano y Guam rechasando e iniciativa Europeo, bisando cu “no ta kere cu institucionnan Mericano lo tuma e lista di Comision Europeo na cuenta.”
