Un ciudadano di Bahamas y dos di Alaska a pidi pa nan por tin participacion den un caso penal contra Carnival Corporation, cu ta tumando luga den corte na Miami, cu ta e base di e linea crucero. E caso ta trata di delitonan cometi pa e compania contra leynan ambiental.
Den un mocion di emergencia registra diahuebs pasa, e tres personanan a urgi hues Patricia Seitz pa reconoce nan como victima den e caso y facilita nan pa revisa un acuerdo pendiente entre fiscalnan federal y Carnival Corporation. E compania a nenga di discuti e mocion.
Seitz a pidi pa presidente di hunta Micky Arison y presidente Arnold Donald atende un audiencia unda e hues di districto lo revisa e acuerdo encuanto e acusacion di violacion di regla ambiental, entre Carnival Corporation y fiscalnan federal. Carnival tin 105 barco y nuebe marca di crucero y ta e compania mas grandi na mundo.
Abogado Knoll Lowney, di Seattle, ta representa e supuesto victimanan y ta bisa cu su clientenan no ta busca compensacion financiero, pero cu nan ta desea mas transparencia den e caso.
Ta acusa Carnival di viola su periodo di prueba di ocho aña, cu seis acusacion nobo cu ta origina den e sentencia di 2016, pa a benta desperdicio di azeta di su barconan di Princess Cruises den oceano, y sconde e echonan. Como parti di e reconocimento di culpabilidad di Carnival, e compania a paga $40 miyon y na april 2017 a cuminsa su periodo di prueba di 5 aña. Tabata e di tres condena di e compania pa mesun violacion desde 1998.
E grupo ambientalista Responsible Cruising na Alaska y e grupo ambientalista di Bahamas reEarth, ta alega cu nan ta representa comunidadnan local cu ta experimenta daño causa pa Carnival su barconan.
