Bahamas ta aparece como e pais di region di Caribe menos corupto, mientras Guyana ta aparece entre 22 pais cu a haci mehoracion significante, di acuerdo cu e organisacion internacional Transparency International den su informe pa 2019 di “Corruption Perception Index”.
E entidad a investiga y midi corupcion den sector publico den 180 pais o teritorio y a haya un score riba un escala di 0 pa 100, unda 0 ta altamente corupto y 100 ta significa hopi ‘clean’.
Transparency International ta bisa cu un score di 40/100 pa Guyana ta haci e pais aki uno cu a mehora significantemente riba CPI desde 2o12, mientras gobierno di e pais ta continua cu su disposicion di demostra su voluntad politico pa tene anterior politiconan responsable pa mal uso di recursonan di e pais.
Bahamas ta aparece como e pais menos corupto den nos region cu un score di 64/100, como number 29 riba e lista internacional. Barbados ta sigui inmediatamente como number 130 riba e lista cu 62/100. Cuba tabata number 60 cu un score di 48/100. Hunto cu Guyana, trinidad & Tobago a score na di 85 lugar riba lista cu 40/100.
E paisnan cu ta lidera e tabla como esnan menos corupto ta New Zealand y Dinamarca, hunto na cabes cu un score di 87/100, mientras Hulanda ta na posicion 8 riba e lista, cu un score di 82/100. Somalia ta den sotano como pais mas corupto, cu un score di 9/100.
