Funcionarionan di nivel halto di Antigua & Barbuda, Barbados, Dominica, Grenada, St Kitts &Nevis, St Lucia y St Vincent &the Grenadines a reuni cu e director di Pan American Health Organization/World Health Organization (PAHO/WHO), Carissa Etienne, riba diabierna pasa pa firma un strategia pa cooperacion den salud publico pa tur e paisnan menciona, vigente te 2024.
“E strategia aki ta e vision di con boso ta mira cu PAHO/WHO por apoya e trabao di boso ministerionan lo miho posibel pa mehora salud di nan pueblo”, Etienne a conta e lidernan di salud di Caribe. “E ta den linea cu e politica, strategia y plannan nacional di salud di boso paisnan, como tambe cu metanan bon estableci den henter Caribe y den e cuadro di desaroyo sostenibel multi pais di Nacionnan Uni pa Caribe.”
E strategia nobo aki ta e di dos acuerdo di e caracter aki entre PAHO y e grupo di pais. E ta enfoca riba metanan cu anteriormente no a logra, mientras cu tambe ta atende desafio nobo cu e paisnan ta enfrenta, incluyendo reforma di sector di salud rekeri pa responde na necesidadnan di un poblacion embeyeciendo, e peso creciente di enfermedadnan no transmisibel, y e efecto riba salud di cambio di clima, entre otro.
E strategia di cooperacion 2018-2024 pa Barbados y e islanan di Caribe oriental ta basa riba cinco prioridad: reforsa e sistemanan di salud di e paisnan pa promove cobertura y acceso na salud en general; reduci mortalidad y caso di enfermedadnan transmisibel manera HIV, tuberculosis y hepatitis B; logra salud familiar optimal durante henter bida; reduci e peso di enfermedadnan no transmisibel; y fortifica preparacion y contesta den caso di emergencia di salud y desaster mientras tambe ta reduci menasa y riesgonan ambiental.
