Diabierna ultimo durante Green Aruba Conference Bon Dia a papia cu un organisacion cu ta purbando pa trece mas colaboracion y conscientisacion entre islanan ABC riba tereno di maneho di sushi: Caribbean Waste Collective.

Nephtalie Demei, kende ta traha como PR pa Caribbean Waste Collective ta splica cu nan como un organisacion ta para riba e conscientisacion y colaboracion pa loke ta trata waste management riba e islanan ruman Aruba, Boneiro y Corsou. Pa yega na miho colaboracion y comprension entre e 3 islanan e organisacion ta papia cu diferente stakeholders den e area di waste management. Tanto di e parti oficial manera gobierno, Serlimar y Selikor como organisacionnan chikito cu ideanan grandi manera Plastic Beach Party.

E enfoke di e organisacion ta pa pone mas enfoke riba organisacionnan cu ta purbando di recicla of bin na maneranan innovativo con pa anda cu waste management. Pero mas aleu e organisacion tambe lo kier yuda efectua polisanan mas integra entre e 3 islanan pa asina bin na un maneho di sushi mas comprensivo.

“Un ehempel ta si bo tin un organisacion cu ta recicla glas na Boneiro y bo tin un organisacion cu ta recicla plastic na Aruba, nos kier pa e organisacionnan aki haya mas actividad entre e islanan. Pues e compania cu ta procesa glas na Boneiro ta haya glas manda for di Aruba y Corsou. Pa esaki mester por ehempel baha e gastonan di transporte entre e islanan.”

Esaki tambe por contribui segun sra. Demei pa e organisacionnan mas chikito sigui existi. Hopi biaha e tipo di startups aki ta cuminsa cu nan proyectonan pero nan no ta haya suficiente clientela pa por sigui.

E organisacion ta conecta e organisacionnan cu kier haci reciclahe of otro actividad relaciona cu waste management cu esnan cu ta produci e sushi. Un ehempel di un proyecto cu nan a traha riba dje tabata entre Curacao Liqueur y Limpi Curacao. E compania cu ta traha productonan alcoholico ta produci 450 mil cup di plastic pa aña. “Esey ta hopi plastic cu ta bay perdi. Nos a papia cu Limpi Curacao cual ta un organisacion chikito di un pareha local y conhuntamente cu e compania di licor nos ta mirando pa cambia e tipo di plastic cu ta wordo uza pa e cupnan.”

E rason pa cambia e tipo di plastic sra. Demei a splica ta pasobra nan no por recicla e cupnan cu ta wordo tira afo manera nan ta, pasobra e plastic cu ta wordo uza ta mucho dificil pa recicla.

Di e manera aki por mira segun sra. Demei cu te hasta cambionan chikito cu por bin den procesonan di produccion por haci un impacto grandi. P’esey sra. Demei ta enfatisa cu e organisacion tambe ta purba conscientisa publico ‘pasobra nos mester bira mas consciente riba e efecto cu plastic tin riba nos lama’.

Sra. Demei a enfatisa cu tur plastic cu wordo tira afo, specialmente si ta papia di un isla, ta drenta den lama. Ora cu e plastic drenta lama pisca ta come esaki y esaki despues ta bira parti di e cuminda cu nos ta come. Sinembargo e plastic tambe ta wordo disolvi den particulanan fini cu ta flota den lama, manera sra. Demei a mustra nos (den potret).