Caribbean Mercantile Bank N.V. (CMB) cu orguyo ta anuncia su contribucion di Afl. 10,000.00 florin na Club Kibrahacha 60+, liderando e proyecto esencial di ‘Telefoon pa adulto mayor’. E donacion aki ta un reconocemento di e causa noble di Club Kibrahacha, su empleado-, y voluntarionan pa cuida nos mayornan.
E proyecto ‘Telefoon pa adulto mayor’, inicia pa Club Kibrahacha 60+ oficialmente na April 2023, ta un esfuerso pa combati e soledad entre nos mayornan, usando tecnologia progresivo y vision innovativo. E servicio aki ta brinda oportunidad pa boluntarionan ofrece compania y consuelo na nos mayornan, specialmente durante temporada di fiesta, pero tambe durante henter e aña.
CMB ta balora y aprecia e esfuersonan incansable di Club Kibrahacha 60+ pa mehora e calidad di bida di nos mayornan. “Nos ta spera cu e contribucion aki por yuda trece consuelo, alegria y compania na esnan den nan aña di oro,” Sr. Roberto Dijkhoff, Managing Director di CMB a comenta. “Nos ta orguyoso di nos partnership cu Club Kibrahacha 60+ den crea un futuro mas feliz y inclusivo pa nos grandinan,” Ilán Lopez, Marketing & Public Relations Officer di CMB ta comenta.
E contribucion di CMB ta un paso significativo den brinda apoyo di e proyecto, dunando e importancia di cuida nos comunidad di grandinan. Nos ta invita e comunidad di Aruba pa uni forsa y apoya e iniciativa balioso aki. Pa mas informacion tocante e proyecto ‘Telefoon pa adulto mayor’ of con bo por contribui, por favor bishita www.mitainclui.aw
