(CiberCuba) – Envionan di crudo y combustibel for di Venezuela pa Cuba a subi fuertemente den luna di februari despues di e medidanan di Donald Trump, segun datonan di monitoreo di barco di e agencia Reuters.
Memey di un crisis energetico severo, Cuba a ricibi alrededor di 42 mil bari pa dia di azeta crudo y combustibel for di e nacion Suramericano, consolidando e sosten energetico di su aliado politico.
Na october, Venezuela a exporta 28 mil bari pa dia pa e isla y a aumenta su exportacion den luna di november, alcansando 38 mil bari pa dia; pero e cifra di februari tabata hopi mas halto.
E envionan di Venezuela pa varios pais den e di dos luna di aña a aumenta na e nivelnan mas halto desde luna di november memey di incertidumbre riba e decision di Merca pa termina un licencia clave cu ta permiti e compania petrolero Chevron opera y exporta crudo for di e pais Suramericano.
Desde cu Chevron a obtene e licencia na fin di 2022, produccion y exportacion di azeta Venezolano a crece, proveyendo un fuente di entrada crucial pa e regimen di Nicolás Maduro.
Den luna di januari ultimo, mas cu 30% di e exportacion total di Venezuela tabata destina pa Merca; pero Trump a bisa cu e no tin mester di petroleo Venezolano y a duna Chevron un periodo di 30 dia pa termina su operacionnan den e pais ey.
En total, e empresa estatal Petroleos de Venezuela (PDVSA) y su partnernan a exporta un promedio di 934.465 bari pa dia (bpd) di azeta crudo y combustibel den luna di februari.
China a keda e destinacion principal cu alrededor di 503 mil bari pa dia, sigui pa Merca cu 239 mil bari pa dia, Europa cu 69 mil bari pa dia y India cu 68 mil bari pa dia.
Ademas, Venezuela a exporta 315 mil ton metrico di subproducto di petroleo y petrokimico, incluyendo metanol y urea, cual ta un bahada for di 360 mil ton cu nan a manda den luna di na januari.
