Durante dia di ayera por a nota hopi reaccion den nos comunidad pa loke ta trata potretnan cu a aparece riba rednan social di un lancha cu lo a yega Aruba cu materialnan pa campaña politico. E cargamento aki tabata encera articulonan destina pa partido AVP y tambe MAS.

E noticia a haya mas reaccion ainda na momento cu a bin dilanti un publicacion cu despues a resulta di ta falso segun nos fuentenan, riba un website yama ‘La Informacion’. E publicacion a menciona solamente partido AVP y cu gran parti di e materialnan aki lo a wordo confisca pa Guardia Nacional (GN) di Venezuela. E publicacion ta sigui bisa cu lo ta trata di 300 mil dollar di balor di producto. Segun La Informacion, lo a purba di evadi impuesto y otro controlnan necesario cu e pais ta exigi.

Reaccion partidonan
Tanto partido AVP y MAS a duna di conoce cu via diferente canal cu na ningun momento nan lo ta purbando di haci algo ilicito. Por a nota cu diferente persona liga na e partido y/of cu ta traha pa e gobernacion actual a publica loke ta parce di ta un recibo pa e materialnan cu a yega. Nos redaccion a purba busca contacto cu minister Benny Sevinger, pa kende e materialnan lo tabata destina pero a comprende cu e mester a biaha urgente durante dia di ayera.

Den un comunicado di partido MAS, nan ta splica cu nan ta cumpli cu tur regla di importacion debidamente. “Ta asina cu despues di a haci tur posibel pa busca material di campaña for di companianan local, Partido MAS mester a opta pa busca algun parti di material for di afo ora cu no tabata posibel pa haya e color corecto aki mes. Partido MAS, a busca algun T-shirt y bandera for di Venezuela, cu a keda declara debidamente na momento di transportacion. Sinembargo, e compania di transporte a agrega un extra pakete na e carga, sin pone Partido MAS na altura. Na momento di controla esaki na su yegada, cuerpo di aduana a haci nan trabou manera mester ta y a informa e partido di e situacion. Partido MAS mesora a atende cu esaki debidamente y a cumpli cu reglanan cu a keda stipula pa e infraccion aki. Partido MAS kier pone enfasis cu e carga di e partido, NO ta liga na ningun otro partido politico”, e comunicado ta bisa.

Investigacion duanero
Segun informacion di e website 24ora, un duanero di fam Kelly lo ta bou di investigacion pa cuerpo di Aduana ya cu e lo ta esun responsabel di a saca potretnan di cliente y publica esaki riba red social. E noticia ta sigui splica cu Kelly a duna di conoce cu ta un otro persona di inicial Z.K. cu ta traha pa imigracion (IASA) lo ta esun cu a saca potret y publica esakinan. Kelly lo a declara cu e no tabata na haltura cu e persona lo uza e potret pa haci politica cu ne, segun e informe.

Bon dia Aruba lo tuma contacto cu SADA (e sindicato di duaneronan) y tambe mas partido envolvi pa asina haya mas informacion di kico a pasa y ki impacto esaki lo por tin riba e partidonan envolvi.