E temporada di awasero ta laga atras hopi efecto pa Aruba, entre otro daño grandi na careteranan. No ta un secreto cu hopi caretera rond di e isla ta den estado deplorable y constantemente comunidad ta puntra pa ki tempo gobierno ta bay drecha e careteranan aki.

Durante un conferencia di prensa di Departamento di Impuesto (DIMP) ayera mainta, reportero di Bon Dia Aruba a puntra directora di e departamento, Luenne Gomez-Pieters si di e entrada di impuesto di vehiculo di motor cu doñonan di vehiculo tin cu paga anualmente, ta dirigi un parti pa drecha e careteranan cu e automobilistanan ta usa.

Gomez-Pieters a splica cu e ley di cobransa di impuesto di vehiculo di motor no ta traha mescos cu e ley di cobransa di BAZV. E BAZV ta un bestemmingsheffing caminda cu tur e cobransanan di prima di AZV mas cu claro ta bay pa AZV, pero e cobransa di BAZV tambe ta bay pa AZV.

Placa di impuesto di vehiculo no ta bay pa caretera so

Den caso di e ley di cobransa di impuesto di vehiculo di motor, el a sigui splica, tur entrada di impuesto ta bay den e caha di gobierno y na final ta gobierno sa kico ta e necesidad di inversion. DOW ta entrega su necesidad pa inversion den caretera y segun cu tin e placa, ta aloca e ora e placa aki pa inversion di DOW. Por haci un cambio den e ley solamente si esey ta e deseo di gobierno.

“Mi ta di acuerdo cu e clima di nos y por ta [con diki e asfalt ta] cu ta wordo poni no ta necesariamente yuda tampoco, pasobra un tiki awasero cay cu e cayente di asfalt, un truck grandi pasa bo ta wak e asfalt ta kibra, pero mi sa cu e tin atencion di DOW. Aworaki cu mi ta wak cu e presupuesto di Aruba ta balansa, tin surplus, mi ta kere cu nos lo wak sigur cu inversionnan ta yega caminda nan mester yega pa nos tur por mira unda nos placa di impuesto ta bay,” Gomez-Pieters a indica.

Carta di obhecion

Durante e conferencia di prensa, Gomez-Pieters a anuncia tambe cu DIMP a keda cla cu e parti di digitalisacion di entregamento di carta di obhecion. El a indica cu e departamento a tuma nota cu ultimo tempo tabatin basta comentario of pregunta tocante e retraso pa loke ta trata e cartanan di obhecion.

DIMP tin un retraso pa atende cune pa loke ta e cartanan di obhecion. El a splica cu e departamento tin un plan hopi specifico, caminda den cuadro di e landspakket nan ta bay haya fondo necesario pa por tin un ekipo special dedica banda di e ekipo di Departamento di Impuesto mes, cu ya caba ta dedica na traha riba e retraso cu tin, pa cuminsa atende cu esey.

El a informa e contriubuyentenan, individual y comerciante, cu entrante e siman aki ya caba ta posible pa nan haci entrega di cartanan di obhecion via e portal digital ‘Bo Impuesto’.

El a sigui splica cu e contribuyentenan ta custuma di entrega carta di obhecion via email of riba papel, pero esaki tin su riesgonan cune, no solamente riesgo cu papel por perde, pero tambe cu e no ta di un manera structura cu e inspector di impuesto por atende cu e volumennan cu DIMP ta atende cune.

Gomez-Pieters a remarca cu pa luna e departamento ta registra entre dos mil pa tres mil carta di obhecion, cu un structura digital, el a resalta, e departamento por registra e cartanan mas lihe y asina inspector lo por atende di biaha cu e cartanan di obhecion.

E tiponan di impuesto cu por entrega carta di obhecion via e sistema ‘Bo Impuesto’ online ta BBO, BAVP, BAZV, BBVAM cu a wordo aboli eigenlijk, dividend belasting, grond belasting, inkomstenbelasting, primanan di AOV, AWW, AZV, loonbelasting, overdrachtbelasting, successiebelasting, toeristenheffing y winstbelasting.

El a splica cu aworaki nan ta cuminsa cu e prome fase y otro obhecionnan, por ehemplo, contra reduccion di impuesto, contra un cobransa adicional di impuesto di vehiculo di motor, un decision pa unidad fiscal of decision pa tarifa special di inkomstenbelasting, por bay den e segunda tanda. “Nos ta cuminsa cu e volumen cu nos conoce y cu e contribuyentenan tin mas conocemento di dje y den e di dos tanda ta sigui cu e otro obhecionnan,” el a bisa.

El a agrega cu obhecion contra e verzamelloonstaat y verzamelstaat derden lo bay den e di tres tanda caminda entrante otro aña ora cu e contribuynetnan mester entrega nan verzamelloon staat 2023 lo por haci un obhecion, via e portal mes, si acaso tin cambio den esaki.

E directora di DIMP a indica cu tin un trabao caba cu ta den un ritmo constante ora ta trata e manera cu nan ta atende cu e retraso di cartanan di obhecion y e ekipo di DIMP cu t’ey aworaki ta atende alrededor di tres mil carta di obhecion pa luna.

El a remarca cu e retraso ainda no a wordo elimina completamente, pero nan ta spera cu nan por reduci e tempo di espera ora ta trata cartanan di obhecion.

El a recorda cu anteriormente nan a haci esaki caba cu e restitucionnan cu tabatin pendiente y a elimina e retraso cu tabatin pa cu esaki y aworaki nan ta pagando caba e restitucionnan di 2022 den 2023.