Hefe di e seccion di inspeccion di higiena y alimento, Yvette Geerman a bisa cu berdaderamente carnaval ta un temporada dushi y bunita, unda pueblo di Aruba ta gosa y celebra. Pero nan kier pone atencion riba consumo di alimento safe y bon higiena durante e periodo aki.

El a laga sa cada aña miyones di hende rond mundo ta bira malo pa medio di cuminda cu no ta wordo bon prepara. Nan kier pone atencion no solamente na tur esunnan cu ta bende cuminda durante e carnaval, sino pueblo carnavalesco tambe pa bira mas consciente y critico.

Carchi di salud
Esunnan cu a bin na remarca pa por bende cuminda banda di caminda tene cuenta cu carchi di salud of carchi berde tin su proceso pa bin cla cu ne, y e temporada di carnaval ta cortico. Ta importante pa nan haci nan peticion mas lihe posibel, ya cu ainda bo ta na tempo. E proceso aki ta dura por lo menos 10 dia, pero nan lo tene cuenta cu esunnan cu a bin den remarca pa bende cuminda durante carnaval.

Sra. Geerman a anuncia cu DVG lo pasa inspecciona tur e localidadnan. Tur esunnan cu ta bay bende cuminda nan mester tin nan carchi di salud na ordo. Tambe nan mester pone atencion riba e puntonan necesario pa bende cuminda pa publico “Si nan no tin nan carchi di salud na ordo nan no por bende”, el a laga sa. Esaki ta un rekisito basico cu ta hinca den ley y cu mester cumpli cu ne.

Temperatura
Pa esun cu ta bende cuminda durante carnaval e kier pa nan corda cu ora nan ta prepara of bende nan, nan tin cu hacie “mescos cu na bo cas of den un restaurant.”

Tambe e ta alerta e consumidornan pa ora cu nan ta bay cumpra cuminda for di nan, observa bon si berdad esun cu ta bende e cuminda, nan higiena personal ta na ordo. Nan mester tin suficiente ijs of frishider pa bo por warda e cuminda den temperatura frio, kiermen 5 grado bay abou. Ora e cuminda ta wordo sirbi e mester ta bon cayente kiermen 60 grado bay ariba.

Sra. Geerman a laga sa cu e zona peligro di temperatura di alimento ta entre 5 cu 60 grado, ya cu esey ta e termino di temperatura unda e bacteria ta multiplica, pero tambe e riesgo cu e persona por bira malo pa consumo di cuminda den mal estado.

Tin hopi factor cu por influencia riba e bon condicion di e cuminda entre nan calor. Aruba ta un isla calor y ora nos ta bay wak carnaval e temperatura promedio ta 30 grado. E ta e temperatura ideal unda bacteria ta multiplica. Tin biaha e cuminda ta keda largo exhibi pafo di e temperatura ideal pa conserva nan di e multiplicacion di bacterianan cu ta daña e cuminda cu eventualmente bo ta consumi. “Nos kier pa e pueblo carnavalesco pone atencion riba dje.”

Un conseho ta cu prome bo ta bay carnaval come of desayuna bon den bo cas, pasobra bo ta bay ta hopi rato afo. Si bo ta bay cu cuminda, wak bon ki sorto di cuminda bo ta bay hiba. Un sugerencia ta di hiba cuminda cu tin menos risico cu e bacteria por crece den dje. Pa ehempel si bo ta hiba pan hib’e cu beleg y no pone mayonaise den dje. Si bo ta hib’e cu mayonaise, ta bon pa e consumi nan mesora. Pa esun cu kier hiba bbq ta preferibel pa bo prepar’e den forno un dia prome, y dia di carnaval bo ta uza bo grill pa gewoon keinta e cuminda.

Prevencion
Departamento di Salud Publico kier pa pueblo conscientisa su mes y nan ser keri riba cumindanan cu no ta bon prepara, y cu eventualmente nan por core e riesgo di bira malo. E temporada di carnaval ta uno cu pueblo carnavalesco generalmente ta consumi cuminda pafo di cas. Nan ta cumpra cuminda cerca esunnan cu ta bende cuminda cant’i caminda. Tin biaha e hendenan aki ta prepara e cuminda den e mesun luga, y nan no tin tur e materialnan y facilidadnan cu nan tin den nan cas pa prepara y conserva e cuminda adecuadamente.

Un aspecto importante ta limpiesa, y mester wak si e bendedo su luga ta limpi. Entre otro si nan man ta limpi, si nan cabey ta bon wanta, of si esun cu ta prepara e cuminda no ta huma y den e mesun momento ta prepara cuminda, entre otronan. Otro asunto ta si e persona cu ta traha e cuminda ta nister y pasa su man unda cu ta, y despues e ta sirbi bo e cuminda.

Tambe con e bari di sushi ta ubica y protegi di musca y otro bestianan cu ta cargado di e bacteria cu por contamina e cuminda. Un aspecto masha esencia ta e disponibilidad di awa, y DVG ta poniendo hopi atencion riba dje durante nan control, ya cu uzo di awa ta importante pa bon higiena. Pues esun cu ta bende cuminda mester percura pa semper nan tin awa limpi y e tanki di awa tambe mester ta limpi pa evita cualkier contaminacion. Nan mester tin habon pa laba nan man y serbete pa seca nan.

Jurette Croes kende ta promotor di salud di e seccion di informacion di departamento di Salubridad Publico (DVG) a laga sa cu tur siman nan ta bin cu topico relevante riba e tereno di salud. Nan a bin e siman aki cu asunto di e reglanan di higiena riba benta di cuminda specialmente durante e temporada di carnaval aki. E ta un forma pa conscientisa nos comunidad riba cuido di salud specialmente den e temporada cu nos ta actualmente di carnaval.