Ayera mainta, minister di Finanzas, Asuntonan Economico y Cultura, Xiomara Maduro a ofrece un conferencia di prensa pa trece dilanti e actividadnan cu lo tuma luga pa Dia di Betico, cu lo conta cu algun cambio relaciona cu medidanan pa combati transmision di Covid-19.

Minister a dirigi algun palabra pa loke ta trata e dia di celebracion aki, specialmente di perseverancia pa e pais cu a keda persevera, no a stop y a sigui den union. “Esey ta algo cu Betico a mustra nos den e lucha pa locual ta Status Aparte”, el a sigura.

P’esey, riba ocasion di celebracion di fecha di natalicio di Betico Croes, Dia di Betico 25 di januari, Maduro a expresa cu e palabranan ‘determinacion, perseverancia y den union’ ta e palabranan cu mas a wordo usa pa por describi e celebracion aki.

Minister Maduro a indica cu e aña aki e celebracion ta diferente pa motibonan conoci, pero p’esey mes, comision di Celebracion di Dianan Nacional a traha pa asina por presenta un programa, pa no keda sin celebra e dia special aki.

Ora aña habri, dianan aki a bin pasando pa recorda un di su logronan, cual ta e lucha di Status Aparte, segun minister Maduro a sigura.

Manera tur aña cu tabatin un manifestacion cultural, e aña aki lo ta di forma virtual. El a splica cu tin un cantidad limita di artista cu ta bay presenta cumpliendo cu e reglanan di protocol di Departamento di Salud y Crisis Team.

Nan lo haci nan presentacion y comunidad por sigui esaki dia 24 di januari via varios medio di comunicacion for di 8or di anochi, lo cual ta bira e manifestacion cultural, caminda manera tur aña minister Maduro como mandatario encarga cu Cultura lo hiba un discurso pa conmemora e dia special aki.

Dia 25 di januari, e acto protocolar lo tuma luga pa 9or di mainta na e plasa cu ta hiba su nomber. Y esaki tambe ta bay tuma luga di un manera diferente, pa motibo cu no lo tin e invitadonan manera custumber, sino den un cantidad limita, como Gobernador Alfonso Boekhoudt y representante di parlamento. Pa loke ta trata gobierno, no tur minister lo bay ta presente, pero e yiunan di Betico si lo ta presente. Minister presidente Evelyn Wever-Croes lo hiba su discurso y eynan tambe nan lo mester tin tur protocol di salubridad.

“No ta bay permiti publico” minister Maduro a expresa. Pa e motibo aki e caminda di Vondellan y tambe e caya Rumbastraat lo ta cera pa trafico.

Di actividadnan publico, minister Maduro a afirma cu no lo duna permiso pa lo cual ta bira actividadnan publico. Relaciona cu esaki, for di aña pasa gobierno a indica cu gobierno mes no ta bay organisa y no ta bay sostene e parti cu por crea aglomeracion di hende. “Awor mas cu nunca nos mester tin control riba esaki”, el a sigura.

Un punto special cu minister Maduro a trece dilanti pa prensa ta cu debi cu no por tin aglomeracion di hende, no tur di nan por ta presente den acto protocolar aki, ta bay brinda e oportunidad pa retransmiti e acto mesun manera cu e celebracion di Dande Virtual na december ultimo.

Di otro banda, minister Maduro a menciona cu lo cual ta bira material pa scolnan, nan tin un recuerdo pa e muchanan cu diferente potret di Betico Croes, na unda cada potret tin un descripcion di kico Betico Croes tabata.

El a bisa cu meta di esaki ta pa asina por conscientisa e muchanan di e importancia cu Betico Croes tin pa Aruba y pa nan tambe por siña conoc’e. Conociendo e tambe nan lo haya e enseñansa di e legado cu Betico Croes a laga pa Pais Aruba.

Scolnan basico desde klas 1 te klas 6 lo haya carchinan di recuerdo cu un number riba dje, cu despues di e acto protocolar lo bay saca un number ganado y esun cu gana lo haya un premio como tablet y material pa scol, segun loke minister Maduro a señala.

Tambe el a declara cu ta importante pa acentua cu su persona como mandatario encarga pa asuntonan di Cultura desde e momento cu el a asumi e responsabilidad aki semper a percura –hunto cu Comision di Celebracion di Dianan Nacional – pa e muchanan desde trempan wordo conscientisa riba ken ta Betico.

Di mesun manera, el a recorda cu aña pasa nan a presenta e buki ‘Danki na dje’ cu tur lo cual Betico a haci y kico e pais ta gradici na dje tambe cu informacion, manera el a menciona caba e aña aki nan tin e carchinan ‘determinacion, perseverancia y den union’ lo cual ta bira e recuerdonan.

Banda di esey tambe, minister Maduro a comenta cu e aña aki lo tin un competencia ‘Conta mi di Betico’ e cual ta un competencia pa tur e muchanan di 4 klas te cu 6 klas, na unda nan por conta den un storia cortico nan inspiracion riba Betico.

El a bisa cu esaki ta importante pa promove amor pa cultura y pa idioma papiamento, ademas ta enrikece idioma cu creatividad di e hobennan, stimula pa busca informacion di Betico su historia y pa trece e famianan hunto.

Esunnan cu por participa den esaki ta alumnonan di scol basico den dos categoria, desde 9 pa 10 aña y desde 11 pa 12 aña ,ultimo dia di entrega historia lo ta dia 5 februari na Besturskaantor.

E titulo di historia por ta un expresion usa pa Betico of un expresion nobo di con e muchanan ta pensa si Betico por ta na bida ainda, con lo tabata su pensamento, pa cu esaki, el a manifesta cu e expresion “Si mi cay na caminda, gara e bandera y sigui cu e lucha” a wordo usa for di basta tempo, e biaha aki no lo por wordo usa den historia cu e mucha ta bay traha.

“E ta bunita pa nos scucha for di muchanan tambe” minister Maduro a enfatisa.

Lo tin un cuerpo di hurado cu lo saca tres ganado di cada categoria y lo tin un premio pa cada finalista, dia 19 di februari lo wordo anuncia e ganadonan.