Algun siman pasa Bon Dia a tuma nota di un caso caminda un persona aparentemente lo mester a wordo nenga cuido na botica di servicio Eagle pa motibo di su carchi AZV cu tabata caduca. Nos a tuma contacto cu e botica y AZV pa un reaccion riba e asunto aki y con ta haci ora cu un carchi di AZV ta caduca y mester di cuido urgente.

Riba rednan social tabata circulando rumor cu un persona no a haya cuido na botica Eagle pa motibo cu e tabata tin su carnet caduca. Nos a tuma contacto cu e botica kende a reacciona cu nan lo mester sa mas informacion di e pashent pa wak kico a pasa, pa motibo cu kisas esey no tabata su botica. “Mi no por imagina, nos no ta nenga hende akinan mas bien nos ta purba yuda tur hende posibel. Lo mester tin un bon motibo si esey tabata e caso. Si nan no ta bao nos botica of no tin prescripcion valido di dokter, e ora nos no por yuda. Normalmente akinan tur hende ta djis contento con nos servicio ta”, un empleado di botica Eagle ta bisa Bon Dia. E botica tambe a enfatisa cu si carchi ta caduca, nan no por declara nada na AZV pues e asegurado lo djis mester paga pa su servicio/medicina. Nos a puntra e botica si esey ta algo cu sa pasa hopi cual nan ta enfatisa cu no ta e caso.

Ley di AZV
E leynan di AZV ta defini cu e asegurado tin un derecho, pero e tin un obligacion tambe, asina e instancia ta informa: “E derecho bo tin pa haci uzo di AZV na momento cu bo ta inscribi na Censo di Aruba, y na momento cu bo residencia principal ta Aruba. Pues, bisando esey e ta un AZV pa ciudadanonan di Aruba pero tambe pa hende naci pafo di Aruba cu a bin residencia na Aruba. Nan ta bin na remarca pasobra nan ta contribui tambe na e fondo.”

Dunado di cuido por nenga
Riba e parti di maneho, ley ta bisa cu e asegurado mester tin su carnet na ordo. Pues na tur momento cu e asegurado kier haci uzo di cuido medico; sea ta acudi na dokter di cas, bay un botica of specialista, bo mester tin e carchi di AZV vigente. Manera tur hende sa, cada carchi tin su fecha di vencemento cu ta poni riba dje. Vocero di AZV Solange Tchong: “Pero ta asina si cu pa yuda toch e dunadonan di cuido, nos tin un portal special pa nan unda cada dunado di cuido tanto nan mes, nan assistentnan of empleadonan por bay riba dje y wak real time si e persona para su dilanti tin e derecho ariba AZV of no.”

Segun sra. Tchong, esaki ta un instrumento cu nan a institui hopi aña atras caba pa yuda e dunado di cuido. E dunado di cuido tin posibilidad di bisa no si e caso no ta urgente, ta pidi pa bay AZV bek pa drecha e carchi. Y basicamente esey ta un procedura di actua corecto. Pasobra atrobe e propio ley ta duna un derecho, pero tambe un obligacion, e ta enfatisa.

No ta asina preto cu blanco
E compania di segura ta laga sa cu ‘naturalmente e no ta asina preto cu blanco pasobra ta trata akinan di cuido medico, cual ta hopi sensitivo referiendo na bo salud na e momento ey’.

“Pero hustamente pasobra AZV no kier pa hendenan core riesgo, nos ta pidi asegurado semper (for di ora nos a habri na 2001) pa tene cuenta cu esaki. E dunado di cuido ta keda den cierto sentido cu e tarea cu e ta evalua e ora con urgente of no urgente e caso ta. Mas cu claro si ta un caso di bida y morto, kere mi e dunado di cuido lo atende e persona di biaha. Si ta casonan cu no ta urgente y berdaderamente pashentnan mes tin un parti di responsabilidad, e dunado di cuido lo mustra bo riba esey tambe door cu nan sa e ta un obligacion”, sra. Tchong ta splica nos.

Na varios ocasion AZV a yega di haya casonan di urgencia unda e seguro no tabata regla y ta bati na porta por ehempel un diabierna atardi ora nan ta cera caba. Nan ta evalua di nan banda si ta yuda mesora of no, generalmente ta yuda mesora. Pero segun sra. Tchong: “Nos ta purba educa e aseguradonan via di señala e responsabilidad cu ta bin riba esey tambe. Hopi biaha nos tin colaboracion di otro instancianan. Manera hospital mes ta uno unda casonan unda tin duda, of toch nan ta wak cu mester duna e cuido urgente. Toch nan lo haci e y despues comunica cu AZVpa check. E regla corecto ta keda cu cada un di nos manera asegurado cumpli cu nos obligacion. Nos tin e tendencia di semper papia riba derecho y nos ta lubida riba e parti di obligacion cu bo tin pa bo seguro.”