Comunidad Colombiano na Aruba mediante un publicacion riba Facebook a duna di conoce cu mañan lo tabatin un caravana pa duna apoyo na nan pais, mirando e situacion social cu e atravesa na e momentonan aki.
Den un flyer cu a circula riba Facebook di diferente personanan a keda conoci cu mañan 3or di atardi tabatin un caravana for di Hotel Ritz Carlton te Plasa Bolivar ubica na Playa, esaki ta pa motibo cu nan kier duna sosten na su pais y na e miles di persona cu tin mas di un siman luchando riba caya contra un reforma tributario cu e presidente Ivan Duque a retira caba pero cu a causa e morto di varios persona, herido y tambe desaparicion.
Mirando cu Aruba ainda ta den un crisis pa motibo di pandemia di Covid-19 mester tuma den consideracion cu e actuacion aki no ta conveniente na e momentonan aki, aunke nan a señala cu nan lo bay tuma tur medida di bio-siguridad pa haci e actividad aki.
Den contacto cu Cuerpo di Polis di Aruba y su vocero Lito Lacle, Bon Dia Aruba a haya sa cu e actividad plania pa maña no tabata conta cu e permiso legal estableci y tampoco lo haya esey pa mañan mes.
Minuutnan despues di e publicacion riba Facebook algun personanan a indica cu e actividad a wordo cancela te proximo aviso pa motibonan legal.
