Ayera tabata un dia largo di marcha cu a cuminsa pacifico y a termina cu bastante violencia, ora parlamentarionan y nan simpatisantenan a haci un intento pa yega te na sede di Asamblea Nacional. Un grupo di ‘colectivos’ (simpatisante Chavista) y efectivo di Polis Nacional Bolivariano a ataca nan cu gas lacrimogeno y cu ‘perdigon’ (municion los). Nan a ataca tambe e sede di partico Accion Democratico, y a tira gas lacrimogeno y perdigon contra nan sede, segun Henry Ramos Allup, secretario nacional di e partido a denuncia.
“Na e momento aki colectivonan di e regimen y PNB ta lansa lacrimogeno y ta tira cu perdigon contra sede nacional di AD. Militantenan a rechasa e atake”, e diputado pa Mesa de la Unidad Democratica (MUD) a skirbi riba su cuenta di Twitter. E legislador a publica un video tambe den cual por mira con e agresornan a ataca e sede politico. Ramos Allup a denuncia mas tempran cu el a ser agredi cu pepper spray den su cara. Richard Blanco, Julio Borges, Lilian Tintori, Henrique Capriles y Milagro Valero tambe a sufri atake, durante e mobilsacion cu oposicion a organisa pa exigi restitucion di e ‘hilo constitucional.’ E marcha convoca pa oposicion a ser reprimi pa Polis Nacional Bolivariano (PNB) y Guardia Nacional Bolivariano (GNB). E ciudadanonan contra gobierno di presidente Nicolás Maduro no por a cumpli nan obhetivo: marcha desde Plaza Venezuela te na Palacio Legislativo, unda tabata spera cu e sesion encuanto e destitucion di e magistradonan di e Tribunal Supremo di Husticia (TSJ).
Como cu Plaza Venezuela tabata ocupa pa e cuerponan di seguridad, e mobilisacion a sali desde e sede di partido Accion Democratico, ubica den La Florida. Un piket di PNB tabata nan prome obstaculo pa yega na avenida Libertador. Carlos Paparoni, diputado pa MUD, a indica desde alrededor di e sede di partido cu nan tabata mantene nan postura di kier marcha direccion Palacio Legislativo na periodista di El Nacional Web. Despues di e entrevista el a hay un baño di pepper spray di e filanan policial.
E presidente di Asamblea Nacional, diputado Julio Borges, a ser agredi pa funcionario di Guardia Nacional y di Polis Nacional ora e tabata marcha den direccion di Palacio Federal Legislativo. Borges a haya pepper spray den su cara, loke a lag’e ciego momentaneamente. E parlamentarionan Milagros Valero, Richard Blanco y Henry Ramos Allup tambe a sufri di asfixia. “Gobierno tin miedo di Asamblea Nacional, gobierno tin miedo di pueblo Venezolano”, Borges a declara.
Tur via di acceso pa yega na e ciudad capital tabata cera riba orden di gobierno, loke a impedi mas di 60 diputado cu tabata bin di otro region pa nan por yega na Palacio Legislativo, unda tabatin programa e sesion ordinario pa debati riba e ruptura di e orden constitucional di parti di Tribunal Supremo di Husticia y e activacion di proceso di remove e magistradonan di e Sala Constitucional. Borges a sigura cu e situacion aki no lo bay impedi cu e Asamblea Nacional lo sigui luchando pa logra eleccion, “pa Constitucion ta esun cu ta reina na Venezuela y no e dictadura cu TSJ ta impone hunto cu Nicolás Maduro”.
“Mundo ta acompañando nos y nos no por permiti cu violencia, miedo, ni e arbitrariedad di gobierno por impedi cu nos ta sigui avansa cu eleccion.Esaki ta e momento cu e pueblo Venezolano mester lucha pa Constitucion y pa eleccion”, e parlamentario a agrega.
Te oranan di atardi tabatin bataya entre efectivonan di diferente cuerpo arma, y principalmente hobennan masculino cu tabata contesta cu piedra e atakenan cu gas lacrimo
