E noticia tristo relaciona cu e fayecimento di Mario Maduro a conmove hopi hende. E tabata un persona amabel y alegre kende danki na su carisma grandi a logra cosecha hopi amistad, principalmente den area turistico di Palm Beach. Hopi hende ta considera Mario como ‘un leyenda’ riba Palm Beach.
E tabata conoci como ‘Capitan Mario’, kende a yega di traha hopi aña cu e boto turistico di bela ‘Mi Dushi’. Ademas Mario Maduro ta ruman di pastoor Jairo Maduro di parokia Inmaculada Concepcion na Santa Cruz.
Ta asina cu diaranson, mientras cu Mario tabata trahando cargando un tanki di oxigeno riba su lomba y lastrando varios riba un garoshi, un di e tankinan a explota. Esun cu e tabatin riba su lomba, pa un motibo ainda desconoci a explota cu hopi forsa, causando lesionnan severo na su curpa, specialmente riba su wes’i lomba. Intencion tabata pa transport’e pa Colombia, pero e no a logra bay, ya cu el a sufri demasiado lesion, y el a fayece ayera.
Mario Maduro tabata traha cu un compania di watersport. Version di prensa divulga den rednan media ta indica cu e tabata trahando ‘zwart’ cu un compania di divers. Ayera merdia -segun version di un miembro di Mario su famia- ainda nan no a papia cu e doño di e compania di watersport. Unabes cu a wordo conoci e caso di Mario su morto, cantidad di comentario a wordo haci via rednan social riba e situacion di e tankinan di oxigeno y falta di inspeccion y control regular riba e companianan di divers.
Tanten cantidad di hende cu tabata conoce Cap. Mario Maduro ta expresa nan convivencia y solidaridad cu e famia di e fayecido. Un persona cu a conoce Mario pa hopi aña a bisa Bon Dia Aruba cu tur su amigonan ta den shock. El a describi Mario como un persona trahado, generoso y cu tabata yuda tur hende sin interes. “Tin biaha e tabata yega cu pisca y e tabata reparti e piscanan cu esunnan cu tabatin mester… Mario tabatin un curason di oro,” el a bisa.
