Mi hendenan nos tey! Un poco curason kibra di tur e dolor cu nos islanan ruman Caribense ta pasando aden, pa motibo di e destruccion di e horcan, mi ta cuminsa cuestiona ki dia nos tabay realisa cu capitalismo ta cabando cu nos? Of miho bisa ki dia nos ta bay realisa cu imperialismo Americano ta destruyendo nos tur?
Claro, comunismo no ta perfecto tampoco, pero unda e exito di capitalismo ta? Si Puerto Rico ta hogando y e prome cos cu Donald Trump a tweet ta: “Nan no tabata tin bon infrastructura y nan debe nos hopi placa.” Si nos mesun Aruba Tourism Authority cu hopi gana ta comparti un articulo di New York Times tocante 5 Carribean islands you can still visit. Pasobra claro, awo cu e otro islanan ta na werki e ta un momento perfecto pa mercadeo. E ta un momento perfecto pa bisa: hey, nan ta na werki, anos no. Aruba na final di dia ta un producto cu ta biba di turismo ta berdad. Pero e echo cu ATA no por mira con ofensivo e ta pa comparti un articulo asina na e momentonan aki ta echt duna mi rabia. Claro cu nan a duna placa y otro necesidadnan manera nan mes a contesta mi.
Esey no ta e punto den e situacion. No worry, e pagina di turismo di Republica Dominicano a haci e mesun stunt. Nan ta bisa: hurricane update, nos ta contento di por
anuncia cu niun di e infrastructura turistico di e isla a wordo a afecta pa e horcan.
Wauw leuk, pero e hendenan na Puerto Plata no tin niun sorto di acceso na awa of coriente. Pa Republica Dominicana su mala suerte, nan siguidonan no ta mes pasivo cu esunnan di nos y nan a bula riba nan nek te cu nan a delete e post. Serio, mi no ta echt worry ken pone mi riba un blacklist na Aruba, amin tin nada di perde toch. Pero mi hendenan, mi ta spera boso realisa con inhumano e cosnan aki ta. Con hopi dolor tin den nos area Caribense actualmente y tur hende ta purbando di explota esaki. Prijsnan di vuelo a subi, Puerto Rico ta un colonia di Merca, Cuba kier manda auxilio y Trump no ta permiti esaki. Pasobra atrobe, tur cos mester bin prome cu bidanan humano. ATA su social media management mester un wake up call y stop di ta problematico. Pasobra
Aruba is still intact, ta bende, pero bosa kico tambe ta bende? Corporate responsability, social justice y actonan di bondad. Estudionan a comproba cu hende kier duna nan placa na luganan y corporacionnan cu ta mas humano. E motibo dicon ta simpel, ora hende duna na un luga cu ta haci bon, nan ta sinti bon. Hopi suerte nos tin cu e Americanonan no ta lanta loco ainda y cuminsa cu un #boycottAruba hashtag, pasobra kere mi nan a haci tur cos menos lubida e incidente di Natalee Holloway.
Cu nan, masha tempo nos ta riba un thin line y nan ta nos mercado principal. Kiermen,
keda lanta. Pero mi no ta bay predica mas, mi ta pensa mi ta bay djis busca un psycholoog y papia cu un pastoor pa wak si nan por yuda mi cu tur e impotencia cu mi ta sinti. Mi tin amigonan yorando 24/7 pasobra nan famianan a keda sin nada. Mi hendenan e ironia di bida ta cu e tin tanto balor y alabes e ta asina fragil. Den nos lucha pa tin mas, pa haya mas, nos ta lubida esey. Cu nos no por duna nos mes demasiado importancia, cu sunu nos a bin y sunu nos lo bay. Mi tin un bon noticia si: compasion ainda ta gratis. Purb’e den e dianan ki.
