Despues di un proceso largo y cu algun contra tempo, finalmente e contracto colectivo (CAO) di cuater aña pa trahadonan di Elmar ta biniendo cla.
Sindicalista di UEA (Union Electricista Arubano), sr. Coby Geerman a declara na Bon Dia Aruba cu e proceso di un CAO nobo ta biniendo cla. Ayera nan tabatin un reunion cu hurista pa revisa e documento aki y wak e cosnan chikito cu ainda nan mester drecha nan.
Segun opinion di e veterano sindicalista aki, esaki ta e prome CAO cu a tarda hopi, pero e ta kere cu di un banda e ta bon. E ta calcula cu den termino di dos siman nan ta keda cla cu e CAO completo . Despues nan lo bay evalua riba otro asuntonan di e trahadonan cu mester regla nan.
El a bisa cu e biaha aki den e negociacion casi tur articulo di e CAO tabatin problema. E ta haya cu tin hende cu ta pidi pa bin cu cierto cambio, pero na su opinion nan por papia di cambio, pero mester wak prome con nan mester bay cu nan. Ya cu mester tene na cuenta cu e realidad y tambe tin aspecto secundario di un CAO, cu ta na bienestar di e trahadonan y cu no tin di haber directamente cu placa. Entre nan un bon seguro, dentista, cubrimento di bril, etc…
“Esey a tarda nos un poco, pero por fin nos a yega na un acuerdo, y den reunion general danki na Dios a aproba pa nos bay continua cun’e”, el a bisa.
