Entrante luna di juni ta bay tin un seminario cu ministerio di Salubridad Publico ta organisa, y un punto fundamental cu lo wordo trata ta un contracto colectivo (CAO) nacional.
“Un contracto colectivo nacional ban bisa basico cu ta aplicabel pa hospital, SABA, Imsan y otro dunado di cuido tambe”, asina presidente di ABV, Gina Maduro a revela na Bon Dia Aruba. Como sindicato ABV a papia riba e tema aki cu nan miembronan den general, no solamente na HOH sino na Imsan tambe. Sra. Maduro ta haya mescos cu na Hulanda tin un CAO nacional, e ta kere cu na Aruba tambe e trahadonan di cuido lo por logra mesun cos.
Plan pa yena vacatura ariba mesa
Sindicato ABV cu ta representa entre otro e trahadonan di enfermeria den Horacio Oduber Hospital (HOH), tambe kier wak e plan traha pa e comision di supervision (Raad van Toezicht) pa yena e vacaturanan den HOH. Sra. Maduro a declara na e matutino aki cu aunke e hunta directiva of Raad van Bestuur ta bay ehecuta e plan aki cu ya caba e comision di supervision a entrega na AZV, logicamente como sindicato nan tambe kier wak e plan ariba mesa.
“Nos kier wak con nos ta bay over di un hospital pa un nobo. Y pa wak si nos ta cumpli cu tur e retonan y exigencianan cu nan ta spera di nos.”
Actualmente menos cu 300 trahado di enfermeria ta trahando den HOH. Un mayoria di nan ta yiunan di tera, pero tambe HOH mester importa trahadonan di enfermeria Hulandes, Belga, Spaño, Canades, Filipino y di diferente otro region. Actualmente nan ta perdiendo cantidad di personal cu ta bahando cu pensioen of cu mester bay bek nan pais. E situacion aki ta trece cu nan ta trahando un tiki desbalansa. “Pasobra cada biaha cu un grupo bay mester bin un grupo nobo”, e ta bisa.
Estudio specialisa
P’esey nan ta biniendo cu estudio di specialisacion den diferente departamento den hospital. Tin enfermeronan Arubiano cu ta probechando e estudionan aki y ora cu nan ta specialisa ta garantisa cu nos tin mas hende local bon prepara y forma. E meta ta cu hospital tin nan propio hendenan cu por traha, ya cu esunnan cu ta bin di afo ta mara na un permiso limita pa un par di lunanan so. “Bo mester tin bo team fiho pa bo por traha miho y bo por conta miho ariba cada un di nan”.
Locual ABV ta boga ta pa e parti di CAO, pero tambe riba e parti di orarionan di anochi pa e wordo paga di un manera mas husto. “Mi ta kere cu e trabou ta hopi y e trabou ta exigi hopi y mi ta kere cu mester haci hopi mas atractivo tambe pa muchanan drenta den zorg tambe”, asina e lider sindical a declara.
