Mundo a pone un record nobo di cantidad di dioxido di carbon den atmosfera, a pesar di reduccion di emision relaciona cu pandemia di coronavirus, cientificonan a anuncia.
Medida di dioxido di carbon, e gas di invernadero principal causa pa humano, tabatin un averahe di 417.1 parti per miyon na Mauna Loa, Hawaii, pa una di mei, luna den cual nivel di carbon den aire ta peak, segun National Oceanic and Atmospheric Administration a bisa. Esey ta 2.4 parti per miyon mas halto cu un aña pasa.
Maske emision di dioxido di carbon di kimamento di combustibel fossiel a cay cu hasta 17% na april, tabata un caida breve. Dioxido di carbon por keda den aire pa varios siglo, pues reduccion a corto plaso di contaminacion nobo cu carbon pa algun luna no tabatin hopi efecto, segun cientifico di NOAA, Pieter Tans.
“Esaki ta ilustra con dificil e ta – con grandi e trabou ta – pa reduci emision”, Tans a bisa. “Realmente nos ta comprometiendo Tera na un cantidad enorme di kentamento pa un tempo hopi largo.”
Record cu medida directo ta bay bek na 1958. Y nivel di dioxido di carbon awo ta casi 100 parti pa miyon mas halto cu e aña ey. Esey ta un aumento di 31% den 62 aña.
“E aumento den nivel di dioxido di carbon den atmosfera no ta stop, y esey ta nifica cu e costo di cambio climatico pa humano y e planeta ta sigui aumenta sin stop tambe”, segun decano di ambiente di Universidad di Michigan, Jonathan Overpeck.
Nivel di dioxido di carbon den aire tabata mas halto den pasado lehano prome cu humano, Tans a bisa.
Nivel di dioxido di carbon ta peak na mei pasobra cuminsando na fin di mei, ya cu mata cu ta crece ta chupa pas di e gas, e cantidad den aire ta reduci, Tans a bisa.
