Cantidad di turista te cu Februari keda bao e proyeccion: Bishitantenan a laga mas placa atras mientras cu e recuperacion di Aruba ta esun miho den region

Aruba a yama 77 mil 961 turista na Februari ultimo, un recuperacion di 84 porciento compara cu Februari 2019. E proyeccionnan haci pa 2022 tabata cu e lo tabata un miho aña cu 2021, e proyeccionnan preliminar tabata mustra cu a spera di recupera mas cu 100 porciento di turismo den comparacion cu 2019, cu tabata e miho aña den cantidad di bishitantenan pa Aruba. como tal a bira e base pa haci comparacion. Asina Minister di Turismo Dangui Oduber a bisa ayera.

E variante Omicron di e coronavirus SARS-COV-19 a causa un presion negativo pa turismo di Aruba. E yegadanan a cay drastico na Januari cu a nifica cu mester a reevalua e proyeccion y ahusta esakinan. Pero segun e Minister, ta mustra cu a recupera di e sla di Omicron y na Januari a bin cu strategia nobo pa stimula e bishitanan na Februari, y segun Oduber, e cifranan ta mustra cu a logra. Ultimo fin di siman mes a yega casi 10 mil turista, cu ta duna un señal cla cu ta yegando na nivelnan di 2019. Esaki tabata e cifranan cu tabata registra prome cu e pandemia.

E cantidad di turista na Februari pues mes no ta mes halto cu locual a registra na e mesun luna den 2019, pero en todo caso, e ta un cifra mas halto cu e cantidad di bishitante cu a yega Aruba na Januari e aña aki cu no a yega 60 mil. Den otro palabra entre Januari y Februari tin un crecemento di 18 mil turismo, cu ta un crecemento di 30 porciento.

“Aunke cu den Januari, nos no tabatin e cantidad di turista cu nos a spera, toch e cantidad di placa cu turistanan a laga tras, esta e ‘tourism receipt’ tabatin un recuperacion di 79 porciento. Esaki ta indica cu e turistanan cu a bin Aruba na Januari, tabata personanan di un categoria di entrada halto, pasobra nan a laga hopi placa atras den nos economia.”

Pa loke ta comparacion cu region, Aruba ta e pais cu ta recuperando e miho. Esaki ta ilustra e resiliencia di e producto turistico di Aruba. “E recuperacion di nos mercado principal, esta e mercado Mericano a duna señal hopi positivo den luna di Februari. A recupera 92 porciento di e mercado Mericano. For di Merca so a ricibi 108 mil 170 turista te cu Februari 2022. “Esaki ta casi na e nivelnan pre-pandemia. E ta un cifra importante pasobra ta trata di e mercado mas importante, di unda 90 porciento di nos turismo ta depende di dje.”

Hulanda

Otro mercado cu a mustra recuperacion ta esun Hulandes, hasta mas cu a spera. Es mas, e mercado turistico for di Hulanda a bira mas grandi con e tabata. E mercado di Hulanda a produci 107 porciento compara cu 2019. “Esaki logra pasobra nos a haya vuelonan adicional di KLM y TUI for di Hulanda, y nos por mira esaki den nos resultadonan.”

E ultimo mercado cu tin hopi potencial ta Colombia. A anuncia diferente vuelo nobo for di e pais Sur Americano. Y e turistanan di Colombia a cuminza bolbe Aruba na cantidad. E recuperacion di mercado na Februari tabata di 95 porciento compara cu Februari 2019.

Turismo crucero

Di otro banda, turismo crucero ta keda un reto, y no ta mira e recuperacion na nivel di e turista cu ta ‘stay over,’ e Minister a señala. Tabata na Juni 2021 cu Aruba a habri su fronteranan pa bapornan crucero atrobe y CDC di Merca a prohibi e bapornan aki pa biaha cu turista. E sector aki ta esun cu mas a keda afecta pa e pandemia ya cu e barconan aki ta transporta miles di hende pareu. “Na Februari nos a ricibi 42 447 turista crucero, basa 39 bishita (calls), y si compara esaki cu Februari 2019, e cantidad tabata e tempo ey tabata 86 mil bishita. Nos ta recuperando apenas 40 porciento den turismo crucero. Pero mescos cu e turista ‘stay-over’ nos ta mira un mehoracion pa e siguiente lunanan pa e sector aki, unda poco poco ta bay tin e recuperacion.” Minister Oduber a bisa cu tin diferente ‘calls’ esta bishita di e bapornan aki confirma pa e siguiente lunanan y ta spera cu e sector lo recupera. “Nos no ta kere cu e ta bay recupera 100 porciento, pero si e lo ta miho cu na Januari y Februari.”

Omicron

E proyeccionnan sinembargo pa henter 2022 mester a keda ahusta pa motibo di e variante Omicron. Inicialmente a kere cu ta bay recupera practicamente 100 porciento, pero na e momentonan aki mester a ahusta e cifranan mas abao. “Nos ta proyecta un recuperacion entre 84 pa 95 porciento pa 2022, cu ta un prestacion hopi bon si nos logra nan.” Den concepto di e Minister, si mester logra e cantidad proyecta, e ta nifica cu Aruba ta yegando e nivelnan di 2019. “Cu esaki nos ta bay crea oportunidadnan nobo, ‘spinoffs’ nobo y tambe entrada pa Gobierno pa asina nos por percura pa cubri gastonan adicional cu mester a haci pa motibo di e pandemia.”

AHATA recientemente a notifica cu a mira un recuperacion di 70 porciento di ocupacion di hotelnan, y pa e siguiente luna ta spera un grado di ocupacion di 73 porciento, cu ta bay sigui aumenta e siguiente lunanan. Minister Oduber mes ta kere cu mirando e desaroyo, cu e grado di ocupacion por hasta yega na 84 porciento na Maart caba. “Esey ta un tendencia positivo.”

Mientrastanto, China ta experenciando otro ola di contagio, pero segun Minister Oduber ta trata aki di Omicron cu ta locual Aruba a pasa aden caba.

Guera na Ucrania

E Ministerio di Turismo hunto cu ATA ta sigui e desaroyo di e guera di Ucrania y su impacto riba entre otro prijs di fuel cu por haci biahe mas caro ainda. “Preliminarmente ta cu nos ta keda mantene na e proyeccionnan, pero ta warda e analisis caba pa mira ki consecuencia e guera lo tin pa Aruba. Mundialmente a mira aumento di prijs di bari di petroleo, cu ta afecta poder di compra di e turista.”

Inversion den producto

Pa por keda dilanti, Aruba mester inverti den su producto y pa medio di e TPEF, esta e Tourism Product Enhancement Fund a cuminza cu e restauracion di e trapi na Rodgers’ Beach cu awor ta drenta su ultimo fase. Esaki ta los di e di dos fase di mehoracion na Baby Beach. Entre otro lo tin un diseño con ta mehora e infrastructura na Rodgers’ Beach, cu ta inclui luga pa para auto, facilidadnan di baño y un restaurant. Motibo di e inversion aki ta pasobra tin mas interes di turista y inversionista pa p’ariba di brug.

Tambe lo usa e fondonan di e TPEF pa drecha e facilidadnan na Hooiberg. A cuminza cu fase 1 caba, cu ta mehora e trapinan. Pero awor kier inclui arte di mosaik na e trapinan, di forma cu e trapinan mes, ademas di Hooiberg, tambe bira un atraccion mas.

Tambe e Minister a bisa cu ta bay sigui cu e proyecto di ‘mountainbike trail’ esta rutanan pa local y turistanan por core ‘mountainbike’ den naturalesa di Aruba. “Ya a haci un estudio di impacto riba naturalesa pa e proyecto aki y el a keda comparti cu ATA, cu tabata e instancia cu a laga haci e investigacion.” Segun e Minister, e mountainbike trail nobo aki tin un impacto negativo minimo riba naturalesa y pa tal motibo mes a pone fondonan disponible pa e proyecto aki. “Nos lo percura pa ehecuta e trail aki.”