For di 2’or atardi ora cu e referendum pidi pa sindicato FTA a cuminsa den sede di Mediador di Gobierno un gran cantidad di trahadonan di CMB a bay haci uzo di nan derecho di vota.
Pa 7’or di anochi e referendum ta cera, y despues lo bini e proceso di contamento di voto pa determina si FTA a haya of no e mayoria di votonan pa representa e trahadonan di e banco aki. Un total di 197 trahado tin derecho di vota. Kiermen den e caso aki FTA mester 99 voto pa bira e sindicato di e trahadonan di CMB. Presidente di FTA, Hubert Dirksz a bisa na Bon Dia Aruba cu nan ta hopi positivo mirando e cantidad di trahadonan cu a bay vota.
Despues di conta e votonan, sindicato FTA a logra e mayoria di voto pa representa e trahadonan bancario di CMB. Un total di 197 trahadonan tabatin derecho di vota. E resultado di e referendum teni na sede di Mediador di Gobierno a mustra cu 123 trahado a bay eherce e derecho aki di cual 122 a vota pa FTA y tres no a vota pa niun sindicato. E resultado aki ta haci cu FTA ta bay representa e trahadonan di CMB pa negosha un contracto colectivo nobo. FTA a bira e unico sindicato cu ta representa e trahadonan di e sector bancario na Aruba.
