Manera ya caba ta conoci, diadomingo ultimo Venezuela tabatin su eleccion presidencial. Na Aruba, ciudadanonan Venezolano tambe a yega na e Consulado di Venezuela pa asina eherce nan derecho di voto, cual a bay den bon ambiente. Sinembargo, despues di eleccion por a tuma nota di un cantidad di sushi cu a keda atras den e area aki.
Desde cu e urna di votacion a habri, 6or di mainta, ciudadanonan por a yega na e consulado pa vota. Durante e transcurso di dia mas y mas persona tabata yega na e sitio y a cuminsa para na banda di e caminda, den cercania di e consulado, cu nan auto, stoel y zonido y tabata celebra e dia importante aki.
Despues di e ciere di e urna, personanan a keda eynan, ambiente a bira mas fuerte, mas hende a yega y Cuerpo Policial a cera e caminda pa asina e multitud di hende por a cana riba caminda mientras nan ta celebra.
Despues cu e resultado preliminar na Aruba a bira conoci, e multitud di hende a cuminsa bira mas chikito y tur hende a cuminsa subi nan auto pa bandona e sitio, pero lamentablemente e multitud di hende a laga atras un cantidad di sushi, entre otro hopi boter di bebida alcoholico, den a area unda nan tabata celebra.
Mester remarca cu ya caba Aruba ta enfrentando un problema grandi pa loke ta trata sushedad rond di e isla, y despues di eventonan asina ta di spera cu personanan cu ta bebe y come ta deshaci di nan desperdicio di un manera responsabel y no laga nan benta na camindanan publico.
