Cantidad di studiante cu ta bay Hulanda ta bahando; Aruba lo ratifica tratado pa reconoce diploma

E siman aki un grupo di hobennan studiante a cuminsa biaha pa sigui nan estudio superior na Hulanda. Mirando e tendencia di e ultimo añanan menos studiantenan ta kies Hulanda pa sigui nan estudio superior. E cifranan ta sigui baha, asina Minister di Enseñansa, Rudy Lampe a laga sa ayera. E desaroyo aki –segun e mandatario- ta cuadra cu nan maneho pa stimula pa nos hobennan keda studia na Aruba of den nos region.

Minister Lampe a desea ‘hopi exito’ pa e hobennan cu a bay Hulanda. “Nos ta sinti hopi orguyo cu nos hobennan a scoge pa studia pa un profesion na Hulanda,” el a declara. Igualmente nos por mira tambe cu na Hulanda tin cierto cambionan, caminda mas programa di estudio superior ta wordo duna na Ingles. E echo aki e ta mira cu ta facilita tambe e exito cu nos studiantenan ta bay tin na Hulanda.

Tambe el a referi cu e internacionalisacion di estudionan di educacion superior ta tumando luga rapidamente, y pa tal motibo recientemente na Buenos Aires, Gobierno di Aruba a firma un acuerdo hunto cu otro paisnan di America Latina y Caribe pa bay over di reconoce e diplomanan di educacion superior.

Tambe gobierno di Aruba ta bay ratifica e acuerdo aki den e reunion di Paris na luna di november venidero. E convenio regional aki lo ta den e tratado internacional di reconocimento di diplomanan di educacion superior. E mandatario a splica cu esaki lo por bira posibel basta cu e institucion di estudio superior cu e profesional nobo a gradua den dje por tin acreditacion di un organisacion acepta y reconoci internacionalmente.