Manera ta conoci un aña parlamentario nobo a cuminsa oficialmente y cu esaki tambe a bin e ciere di e aña parlamentario 2022-2023 cual a trece cune tambe e votacion pa presidente y vice presidente di Parlamento di Aruba durante e reunion publico cu a tuma luga dialuna 11 di september.

Durante e reunion publico aki e parlamentarionan tabatin e oportunidad di duna un discurso pa loke ta trata e ciere di aña parlamentario y tambe e relato anual di Parlamento di Aruba y tur e informacion cu tin den esaki.

Parlamentario y lider di fraccion MAS, Marisol Lopez-Tromp, a toca e tema di loke ta e resumen di e actividadnan di Parlamento di Aruba den e aña parlamentario 2022-2023 y el a trece pa dilanti algun di importancia.

Pa loke ta e cantidad di reunionnan publico cu a tuma luga den parlamento, Lopez-Tromp a subraya e cantidad di e encuentronan publico cu tabatin, 27 den total. El a remarca cu varios di e encuentronan aki, e peticion pa nan tabata pa reunion publico y no pa encuentro publico.

“Esaki ta algo cu nos kier keda pone enfasis riba dje. Como fraccion sigur nos ta kere cu e ta hopi importante pa ora e reunion publico wordo pidi e ta tuma luga pasobra den un reunion publico parlamentarionan por usa nan hermentnan pa controla gobierno, cual ta nifica haci uso di cualkier di e hermentnan disponibel, entre otro mocion, cual ta esun mas conoci,” el a enfatisa.

Pa loke ta e parti di preguntanan por escrito cu a bay pa gobierno di parti di e parlamentarionan, Lopez-Tromp a señala cu den e relato tin un lista di pregunta cu a bay pa cada minister y por wak tambe den e relato cuanto pregunta cada minister a contesta y tambe e cantidad di pregunta cu a keda sin contesta.

E lider di fraccion mas a sigui señala cu por wak cu den full e lista cu un di e ministernan cu a keda sin contesta mas cu mita di e preguntanan tabata Minister di Turismo y Salud Publico, Dangui Oduber, ken a ricibi 189 pregunta y e minister a contesta 98 pregunta di e 189 total. Esaki ta nifica cu 52% di preguntanan cu Minister Oduber a haya, no obstante for di ken el a haya nan, a keda sin wordo contesta.

El a continua y a señala cu riba e mesun lista por mira cu Minister di Energia, Labor y Integridad, Glenbert Croes, a ricibi 164 pregunta por escrito y 96 di e preguntanan aki Minister Croes no a contesta, cual ta 59% di e total di preguntanan.

Lopez-Tromp a indica cu Minister di Finanzas y Cultura, Xiomara Maduro, a ricibi un total di 27 pregunta por escrito, e minister cu menos pregunta a haya durante henter e aña, sinembargo, Lopez-Tormp a menciona, Minister Maduro a keda sin contesta 25 pregunta, cual ta nifica cu 93% di e preguntanan cu el a ricibi no a haya contesta, poniendo e riba puesto number uno di ministernan cu no a contesta preguntanan por escrito di parti di e parlamentarionan.

Den total, segun Lopez-Tromp ta indica, Gobierno di Aruba a ricibi 1307 pregunta por escrito di parti di parlamentarionan durante e aña parlamentario 2022-2023 y di e cifra aki un total di 368 pregunta a keda sin wordo contesta.

“Mi kier a wak kico ta e hermentnan cu tin pa pone nan contesta pasobra nos ta manda reminder, nos ta pidi pa atrobe manda pregunta aden y no ta tur minister ta contesta y nos ta kere toch nan mester duna un contesta. Hasta si bo no ta cla cu un topico, bo mester contesta e parlamentario bise informacion cu bo tin y esun cu bo tin pendiente cu lo por bin despues,” el a enfatisa.

El a agrega cu esaki ta un punto importante cu mester atencion y wak con por adresa esaki, apart di manda reminder, y si den casonan aki, el a resalta, si presidente di Parlamento di Aruba tambe ta hunga un rol den esaki pa pone un enfasis pa e contestanan por yega back parlamento.

Pro ultimo Lopez-Tromp a menciona cu den e lista tambe por mira e cantidad di mocionnan cu a wordo entrega cu tabata 30 mocion den total di cual 20 a wordo acepta, 9 a keda rechasa y un mocion a keda retira.

Parlamentario di fraccion AVP, Mervin Wyatt-Ras, tambe a tuma e oportunidad pa hiba palabra. El a remarca cu mirando e diferente trabaonan cu tin den parlamento, por constata cu e eficiencia di e comisionnan cu ta hopi abao.

El a indica, segun informacion di e relato, cu e comision di Gezin en Ouderen Zorg a reuni un biaha so, comision di turismo tambe a reuni un biaha so, comision di labor tambe a reuni un biaha so. El a sigui menciona cu comision di medio ambiente, un topico cu ta hopi den discusion, no a reuni ningun biaha. El a agrega tambe cu a lanta un comision di Noord Amerikaanse Relaties, pero no a reuni ni un biaha tampoco.

“Nos ta lanta comisionnan ki den pero nan no ta haya un bida. Mester evalua esey ora cu ta bay trata e diferente comisionnan aki,” Wyatt-Ras a remarca.

Por ultimo, e parlamentario di AVP a expresa cu presidente di PArlamento di Aruba, Sr. Edgar Vrolijk, kende a keda re-elegi como presidente, no ta cumpli cu su tarea di presidente manera debe ser.

“E ta interumpi nos, e no ta duna nos hecho personal, ora nos pidi un proposicion di ordo nos no ta haya esaki. Esey ta loke e mester traha na dje. E tin hopi cos di siña. E ta bin cu su mesun pensamentonan cada biaha y bruha tur cuenta y door di esey tambe bo ta mira e eficiencia pasobra si bo no ta funciona bon como presidente, bo no ta bay tras di e ministernan, obliga nan cu nan mester contesta parlamento, bo ta haya un eficiencia asina,” el a finalisa.