Recientemente, Banco Central di Aruba a publica un resumen di su Relato Mensual di april 2021, den cual ta destaca tendencianan monetario pa e luna en cuestion.

Desaroyo monetario

Compara cu maart 2021, e cantidad di placa den circulacion a crece cu Afl. 80,2 miyon te na Afl. 4.937,7 miyon den e luna di april 2021. Esaki a resulta for di un subida den e reserva di divisa netto (+Afl. 234,4 miyon) y un bahada den reserva activo domestico netto (-Afl. 154,0 miyon).

E expansion den e reserva di divisa netto a wordo causa pa compra netto di divisa di Afl 414,5 miyon di publico, principalmente relaciona cu entrada di otro inversionnan y entrada for di turismo. Esaki a wordo parcialmente mitiga pa benta netto di divisa di Afl. 180,2 miyon na publico, primordialmente relaciona cu pago pa importacion y otro servicionan.

E bahada den e activo domestico netto a wordo causa pa un caida den credito domestico (-Afl. 125,6 miyon). Ademas, transaccionnan no relata na credito a baha cu Afl. 28,4 miyon. E caida den credito domestico a resulta for di bahadanan den credito bancario netto na e sector publico (-Afl. 111,2 miyon) y den credito bancario na e sector priva (-Afl. 14,4 miyon).

E caida den credito bancario netto na e sector publico ta wordo atribui na un aumento den deposito di gobierno (+Afl. 114,8 miyon) y credito bruto na gobierno (+Afl. 3,6 miyon).

E bahada den credito bancario netto na e sector priva a wordo causa pa menos credito na empresa (-Afl. 10,4 miyon), y na consumidor (-Afl. 4,3 miyon).

Di otro banda, hipoteca di vivienda a subi cu Afl. 0,3 miyon.

Inflacion

E nivel general di prijs, cu ta wordo midi door di e indice di prijs di consumo, a registra un bahada di 0,4 porciento den e luna di april 2021, compara cu 1,1 den maart 2021.

E contribuyentenan principal na e bahada aki tabata e categorianan “recreacion y cultura” y “paña y sapato”.

Pa loke ta trata e promedio anual di e tasa di inflacion, esaki a keda mescos na -2,3 porciento na april 2021, compara cu na maart 2021.

Entrada di Gobierno

Entrada total di gobierno a suma Afl. 56,8 miyon na april 2021, cual ta Afl. 4,6 miyon menos cu e mesun luna di e aña anterior. Esaki a resulta for di un bahada den entrada no relata na impuesto (-Afl. 5,9 miyon) cu a wordo parcialmente mitiga door di un subida den entrada di impuesto (+Afl. 1,4 miyon).

E caida den entrada no relata na impuesto a wordo causa pa menos entrada no relata na impuesto di Afl. 5,9 miyon. E aumento den entrada di impuesto a resulta di subidanan den, e asina yama “turnover tax” (B.B.O.)(B.A.V.P.) (+Afl. 2,9 miyon), impuesto riba importacion (+Afl. 2,8 miyon), impuesto riba propiedad (+Afl. 1,2 miyon), y impuesto riba ganashi (+Afl. 1,2 miyon).

E subidanan aki a wordo casi completamente mitiga pa un caida den impuesto riba entrada (-Afl. 7,6 miyon). Turismo Aruba no a ricibi turista na April 2020, pa es motibo e cifranan pa turismo di april 2021 a wordo compara cu e cantidad di turista cu a bishita nos isla na april 2019.

Na april 2021, e cantidad di turista a registra 58.774 turista, cual ta 35.179 menos bishitante (-37,4 porciento) compara cu na april 2019. E mercado Norte Americano, Latino Americano y Europeo a baha cu 23.124 bishitante ( -30,2 porciento), 6.838 bishitante (-80,5 porciento), y 4.090 bishitante (-61,8 porciento), respectivamente.

E bahada den e mercado Norte Americano a resulta primordialmente di menos bishitante for di Merca (-19.210 bishitante of -26,4 porciento). E caida den bishitante di e mercado Latino Americano a resulta principalmente di menos bishitante for di Colombia (-1.684 bishitante of -58,6 porciento) y di e mercado Europeo cu tabata tin menos bishitante for di Hulanda (-1.874 bishitante of -51,1 porciento).