(NLTimes) – Pa motibo di un eror di Camara di Comercio (KvK) di Hulanda, e adres priva di 1,800 director di varios organisacion a leak na un ex-abogado. E agencia a pidi e victimanan pa reporta si tin actividad inusual rond di nan cas, segun un carta cu ta den circulacion riba rednan social, y riba cual RTL Nieuws a reporta anteriormente.

Segun e noticiero, esaki ta inclui e datonan di parlamentarionan di D66, GroenLinks, y BIJ1. Un vocero di BIJ1 a confirma cu lider di e partido, Sylvanna Simons a ricibi un carta di KvK informando cu su datonan a leak. E partidonan a haci preguntanan parlamentario riba con e informacion por a leak.

Un vocero di KvK a confirma cu ta trata di adres di ‘un variedad amplio’ di politico y administradornan di organisacionnan local. Adres priva di directornan y otro oficialnan den e Registro Comercial no ta publico. Sinembargo, e hudiciario, abogado, notario di ley civil of deurwaardernan por solicita e informacion aki cu permiso special. KvK a splica cu e ex-abogado a solicita e datonan despues cu el a des-registra como abogado, y pa e motibo aki no tabata permiti pa haci e solicitud.

A kita e permiso pa solicita adres priva for di e ex-abogado en cuestion.
El a notifica KvK por escrito cu a destrui tur data, pero e autoridad a indica cu no tin mas opcion pa check esaki. A haci un reporte na e Autoridad di Proteccion di Data Hulandes. E regulador no sa ainda si ta bay investiga e asunto.

“Bo ta confia e KvK cu bo datonan y esey aparentemente no ta hustifica”, segun presidente di Union Nacional di Studiante (LSVb), Ama Boahene, kende a bisa ta ‘hopi fastioso’ cu e datonan aparentemente ta asina mal protegi. Su datonan personal, como tambe esnan di otro miembronan actual y pasado di e hunta, tambe a cay den man di e ex-abogado. Boahene a puntra su mes con sigur por ta cu e ex-abogado a destrui e datonan y con bon KvK ta bay preveni esaki den futuro.

Despues di e blunder aki, KvK a descubri cu mas ex-agadonan des-registra ainda tabatin autorisacion pa solicita adresnan priva. Ta trata aki di un total di 164 ex-abogado. Den 92 di e casonan, tambe a usa e permiso pa solicita adres despues di des-registracion. KvK ta investigando si e abogadonan a haci esaki nan mes, of e oficinanan pa cual nan tabata traha.