Te cu ayera tardi e total di casonan positivo di coronavirus/Covid-19, a aumenta cu 2 persona, compara cu e dia prome. PR di DVG, Jurette Croes a informa un total di 62 caso positivo. Ainda e edad maximo di persona positivo ta 79 aña y minimo 11 aña.

Loke si a baha considerablemente tabata e cantidad di persona cu tabata den cuarentena. E casonan di personanan den cuarentena a logra yega mas cu 1000. Pero ayera tardi DVG a informa cu el a bira 562 caso di persona den cuarentena.

Igualmente el a informa cu 837 persona a wordo getest. Tambe el a menciona cu tin 774 negativo y pendiente di e resultado final nan tin 1 caso.

Croes a referi cu e cantidad di persona den cuarentena a baha relativamente debi cu e personanan cu ta cumpliendo cu nan 14 dia, keto bay nan a yega na e dos siman ey. Igualmente el a splica cu si e personanan aki no a presenta niun sintoma durante nan periodo di cuarentena, nan ta haya autorisacion di DVG pa sali for di cuarentena.

Sinembargo el a bisa claramente cu esaki no ta nifica cu e personanan aki ta immuun pa e virus di Covid-19. “Tur persona cu ta sali for di cuarentena mester cumpli cu tur regla stipula pa gobierno, entre otro e shelter in place y toque de queda. Tambe nan mester cumpli cu e regla di higiena na tur momento pa nan por proteha nan mes.

 

Tambe el a recorda esnan cu ta positivo isola den nan cas cu mester tuma contact cu nan dokter di cas. Of riba base frecuente informa nan dokter riba nan estado di salud. PR di DVG a bisa na tur persona cu tin sintoma di tos seco, garganta dolor, keintura y problema pa gala rosea. Pero tambe kisas nan ta ripara cu nan no ta haya smaak di cuminda of nan no ta haya holo, nan por tuma contacto via tel 280-0101 of nan por yama nan dokter di cas pa wak si nan ta cay den e criterio pa wordo getest pa Covid-19.

Caso di recuperacion

Te ainda a wordo raporta 1 caso so di e consultant Mericano kende despues di permanece interna den hospital a wordo transporta pa su pais abordo di Air Ambulance dia 19 di maart ultimo bao medida stricto di salubridad. E ta e unico caso cu a recupera oficialmente for di cu Covid-19 a bati nos porta dia 13 di maart ultimo. Mientras cu nos por mira cu den otro paisnan cu a haya e virus aki a raporta mas caso di recuperacion, ainda Aruba a keda pega te 1 caso so oficialmente di recuperacion keto bay.

Bon Dia Aruba a puntra riba e situacion aki, caminda Sharline Koolman di DVG a contesta cu e caso cu un persona por recupera mas lihe cu otro tin di haci cu naturalesa, y esey nos no por deal cune. El a splica cu ainda tin investigacion cu ta wordo haci riba pakico tin e virus cerca cierto hende si of no.

Igualmente el a menciona cu e test cu nos ta haciendo na Aruba ta hopi sensitivo. Kiermen un tiki virus cu bo gara den e muestra cu ta wordo tuma pa test, ya caba e test por sali positivo. Locual e persona ta mustrando ta un zwak positivo. Pero DVG pa dicidi pa sigui mantene nan den isolacion te ora cu e test ta mustra full negativo.