Cantidad di pashent cu fayo di riñon ta alarmante

IMSAN a instala mas stoel pa ofrece hemodialyse, pensando riba futuro y e desaroyo di enfermedadnan di riñon na Aruba. Ta alarmante y preocupante pa constata cu ya caba, den menos di mita di e tempo cu nan a kere nan lo por cubri cu e ampliacion di capacidad ya tur stoel ta ocupa. Minister dr. Alex Schwengle durante di e “Siman di Rinon” a urgi comunidad di Aruba pa ta mas consciente y haci tur cos posibel pa preveni malesa di riñon. E mandatario a subraya cu cambionan simpel den e estilo di bida y nutricion ta corta e risico di haya problema cu riñon cu 50%.

Minister Schwengle a resumi: come hopi fruta y berdura y otro cumindanan saludabel, move of haci ehercicio 30 minuut pa dia, y bebe hopi awa. Asina no solamente ta preveni malesa di riñon, pero e dos enfermedadnan relaciona na malesa di riñon como causante di e fayo di riñon, esta diabetes y presion halto. Den e caso di e malesanan aki, esta diabetes, presion halto y daño di riñon, obesidad hopi biaha ta un actor principal.

Fayo di riñon ta causa cu e riñon no ta filtra e sanger mas y e sanger ta keda “sushi”. Ora bo riñon faya, tin tres opcion. Minister Schwengle ta splica cu e opcion mas conoci ta hemodialyse, esta e proceso unda cu e sanger di e pashent ta wordo pasa pa un mashin cu tin un filter cu ta haci e sanger limpi. E mashin ta pomp e sanger limpi bek den e curpa di e pashent.

Mayoria pashent mester tuma hemodialyse tres biaha pa siman. Mayoria biaha nan ta perde tres dia completo, aunke e proceso di filtra e sanger ta tuma mita dia, pero e pashent ta keda hopi cansa y no por haci mucho mas esfuerso e resto di e dia. E proceso aki ta hopi pisa riba e arterianan di e pashent tambe. E di dos opcion ta uno cu hopi hende na Aruba tin miedo di dje, pero e ta un tecnica cu ta wordo aplica hopi den exterior, esta e peritoneale dialyse. 

Minister Schwengle ta subraya cu e tipo di dialyse aki e pashent mes ta haci na cas, y e tin menos impacto riba e arterianan. Pa haci peritoneale dialyse e pashent ta haya un tubo den su bariga. Pa medio di e tubo e ta pone un likido den su bariga cual ta percura pa limpia e sanger. Despues cu e proceso a completo, e pashent ta saca e likido cu e “sushi” bek for di su bariga.

Lo sigui conscientisa comunidad y motiva pashentnan pa uza e tecnica aki mas na Aruba, e minister a agrega, pasobra e ta un bon opcion pa e pashent. Pa su pashentnan e sistema di cuido di Aruba no lo promove tecnica nan cu no ta sigur y comproba durante di añanan, e mandatario a laga sa.

E di tres opcion pa pashentnan cu daño di riñon, ta un transplante. Un pashent cu ricibi un riñon pa medio di transplante su calidad di bida ta mehora considerablemente, Minister Schwengle a laga sa.

E titular di salud publico a sugeri pa pashentnan cu ta interesa den e opcion aki y nan famianan por check cu miembronan di nan famia pa sondea ken por ta un bon “match” pa un transplant’e y ta dispuesto pa dun’e un riñon. E transplante por wordo regla pa medio di un organisacion Hulandes, y tur dos persona por biba hopi largo y bon cu un riñon, el a añadi.

Minister Schwengle tabatin palabranan di elogio tambe pa e empleadonan di IMSAN kendenan  a organisa diferente actividad na IMSan mes y tambe pa mucha cu diferente wega y hopi informacion tocante cuido di riñon. Igualmente minister Schwengle a tuma nota cu gran satisfaccion di e iniciativa di Clinica di Dialisis di Dr. Horacio Oduber Hospitaal kendenan na nan turno a bishita scolnan basico pa papia riba prevencion di malesa di rinon. 

Dia 10 di maart tabata World Kidney Day y Aruba tambe a conmemora e dia aki cu un siman dedica na conscientisacion. Minister Schwengle ta encurasha comunidad pa ta mas consciente, y ta aplaudi e esfuerso di Fundacion “Kidneys 297” kende nan tambe tabata dedica na informacion y prevencion valioso durante di e siman aki. Aruba adopta custumbernan saludabel y preveni malesa di riñon, y e enfermedadnan cu ta causa malesa di riñon esta “Diabetes” y “Presion Halto”.