Cantidad di parasol instala den santo na beach dilanti hotel nobo ta causa disgusto den comunidad

Recientemente riba rednan social ta circula un potret den cual por mira un cantidad di parasol poni den santo canto di lama dilanti un hotel nobo cu pronto lo habri su portanan. E publicacion di e potret aki a causa un ola di reaccion di parti di tanto turista como localnan cu ya caba ta disgusta pa e situacion di hotelnan cu tin na e isla.

Aña pasa un hotel nobo a habri su portanan y e aña aki dos otro hotel, of sikiera un parti di nan, ta programa pa habri nan porta.

No ta un secreto cu e construccion di mas hotel ta un topico sensitivo, specialmente pa e ciudadanonan local ken pocopoco ta sinti cu nan ta perdiendo nan derecho como ciudadanonan di e isla pa haci uso di e lamanan di Aruba libremente.

Na mas di un ocasion a bin dilanti casonan den cual ciudadanonan ta expresa nan malcontento pa motibo cu cierto hotelnan kier apodera di e lama, of ta pone palapanan riba lama y kier pa esakinan ta priva solamente pa nan bishitantenan.

Na Aruba tin e ley ‘Landsverordening openbare wateren en stranden’ (Ordenansa nacional awanan publico y nos playanan) cu ta stipula cu tur lama na Aruba ta publico. E ley ta dicta: “Den e ordenansa aki y e disposicionnan basa riba dje ta compronde cu awa publico ta awa cu ta accesibel na tur, limita of no, den virtud di normanan di derecho publico.”

Un publicacion recien riba rednan social a bolbe trece dilanti e topico aki. E e potret en cuestion ta mustra con un hotel cu pronto lo habri su portanan na Aruba a instala un cantidad di parasol pa tapa solo den santo na canto di lama pa nan bishitantenan.

Un cantidad di usuario a comenta riba e potret aki pa expresa nan disgusto, mientras hopi otro a cuestiona si e ta legal pa haci esey, y otro nan a puntra ta na cual lama e ciudadanonan lo por bay e ora pa disfruta di un dia den famia na lama.

“Esaki ta pasa ora bo bende patria. Danki na nos politiconan di cracker jack. Enjoy pa nan core bo for di bo mesun tera paso e beach ta pa tur hende. Pami nan kita tur e palapanan, ta dimas,” un usuario a indica.

Mientras otro a remarca cu si localnan dicidi di sinta bou di e parasolnan no por core cu nan pasobra lama ta keda publico.

Otro usuario a indica cu esaki ta un situacion cu ta sucede mas hotel. E usuario a splica den su comentario cu e tereno di hotel ta core te cierto caminda y na e resto di e lama en realidad, segun e usuario ta señala, no mag di pone e parasolnan aki.

“Es ta un ABUSO…Mi ta kere ta ora pa localnan just bay trankil y sinta rond di e parasolnan SIN mishi nada…Gewoon sinta rustig asina y enjoy cu e muchanan”; “Beach ta publico! Pero nan a bin ta kitando loke ta di nos”; “Esaki no mag! Aruba no conoce beachnan priva”; “Unda e localnan ta bay sinta anto?” ; “No di acuerdo, no ta importa con caro e hotel ta. Nos mester defende nos beachnan” ; “Absolutamente cu no! A lo menos cu e hotel tin un convenio cu instancia local, anto ni asina pasobra beachnan na Aruba ta publico,” ta algun di e otro comentarionan cu usuarionan a publica.

Otro usuario preocupa a resalta cu mester pueblo di Aruba mester lanta ariba y tuma accion pa kita tur e parasolnan aki. “Mester kita tur e palapanan paso nan keda e ta mustra cu ta intimida e pueblo y spanta hende pa no bay eynan, esey ta un poder psicologico cu hotelnan ta usa. Nan sa cu Arubiano no ta haci nada, p’esey e cosnan ki ta pasa cu nos. Tristo, nos mester move. Haci algo!! Minister ta esun nan mas culpabel, nan a firma,” e usuario a remarca.

Den e comentarionan un usuario, cu segun el a indica ta traha riba beach y ta Arubiano, a splica cu e cantidad di parasolnan poni ta legal. El a sigui splica cu palapa ta publico y no ta nada si ta di hotel of no, Arubiano, turista, bestia mes por sinta bou di un palapa sin problema.

Pero den e caso di un parasol el a indica cu parasol no ta publico manera un palapa y un persona no por djis bay yega sinta bou di dje si un hotel of compania di watersport ta set up e parasol. “Publico NO tin derecho di hal’e of sinta bou di dje AUNKE beach ta publico,” e a usuario a enfatisa,

E publicacion di e potret aki tambe a trece dilanti e disgusto di hopi ciudadano local, y turista tambe, pa loke ta e construccion y apertura di e hotel na Sero Colorado. Desde e anuncio di e construccion di e hotel aki na Sero Colorado, ciudadanonan local a expresa nan desacuerdo pa motibo cu ta sinti cu esaki lo “kita” e beach for di e localnan.

Baby Beach ta un di e lamanan mas popular na Aruba cu tanto turista como local ta disfruta di dje y ta uno cu hopi persona ta frecuenta. Cu e apertura di e hotel na Sero Colorado, ciudadanonan tin miedo cu e hotel ta bay purba tuma e lama over, haci mescos ta haci cu otro lamanan den e area di High Rise Hotels y restringui localnan di disfruta di e lama.

Falta di claridad den e topico a trece hopi confusion y disgusto entre tanto turista como localnan cu ta haci uso di palapanan pa proteha nan mes di e solo fuerte di Aruba mientras nan ta disfruta di nan dia na lama.