ORANJESTAD – Bon Dia Aruba a puntra director di reclassering, sra. Seraida Pemberton-Leonard, tocante ser femenino cu tambe ta mira ta comete un crimen manera homber. E ta splica cu tin mucha muhe, pero no ta wak e of no ta e mesun nivel di criminalidad.
Pemberton-Leonard ta splica cu en general tin mas hende homber cu hende muhe ta comete crimen. “Di e 20 mucha cu ta bin, por bisa cu un so ta mucha muhe. E ta tiki, pero si bo wak, e ta varia. E ta pasa cu un 10 mucha muhe pa aña.”
Pemberton-Leonard ta aclara cu esey no kiermen cu e mucha muhe ta bon mucha, pero e crimen cu nan sa comete ta otro. Of ta mas facil pa un mucha muhe horta den tienda anto e doño di e luga ta djis kita cosnan mand’e cas, pero si ta mucha homber ta yama polis.
E reaccion, segun Pemberton-Leonard, ta otro. “Di un forma, un mucha muhe no ta wak nan na bista, pero nan t’ey si. Tin un gang, anto ta mira semper un mucha muhe, of si nan ta den nan pareha cu henter e grupo, nan no ta cay cera.”
Segun Pemberton-Leonard nan por ta mucha muhe fuerte. E ta bisa cu ta depende di nan caracter, nan ta eynan pero nan no ta participa cu e otro cosnan cu e gang ta haci, of ta keda pendiente si polis ta yega pa avisa e grupo. “Mi no por bisa precisamente pakico no tin mas mucha muhe, pero semper bo ta wak mucha homber ta cay cera mas hopi.”
Pa locual ta trata e edad di reclassering ta acapara cu menor di edad te cu adulto. Nan tin di tur edad. E ta splica cu edad di castigo pa ley ta cu 12 aña. “Nos sa tin hoben cu ta cay cera. Nos a yega di haya 11 aña, pero ora nan cay cera, nan no ta bin cerca nos, pasobra nos leynan no ta haci cu e mucha chikito ta castigabel.”
