Stichting Kinderhuis Imeldahof conoci den boca di pueblo como Imeldahof , tin capacidad pa 52 mucha. Pero actualmente nan tin 32 muchanan interna cu ta un cifra cu a permanece stabiel pa basta tempo. Mayoria di e muchanan aki ta bin via Directie Voogdijraad. Tin algun caso cu ta pasa via e fundacion GuiaMi y pa medio di otro instancianan tambe.
Nan ta percura cu e muchanan aki por desaroya nan mes den un ambiente safe y agradabel. Pero nan reto no tin di haber so pa brinda un bon calidad di cuido na nan muchanan, sino pa percura pa nan por haya fondo suficiente pa nan proyectonan. Nan ta organisa diferente proyecto pa recrea nan sanamente y pa nan descubri nan talento y habilidad tambe. Nan ta percura semper pa e muchanan por desaroya nan talento riba tur tereno no solamente musical sino entre otro deportivo, danza, etc. Si nan ta gusta un actividad, Imeldahof ta percura pa manda nan y cubri e costo di dje.
Proyectonan
Un proyecto tin di haber cu un programa di musica pa e aña venidero. P’esey nan ta buscando persona interesa pa yuda nan boluntariamente pa duna e muchanan les di musica. Ademas nan lo organisa un actividad den forma di caminata pa colecta fondo cu lo por yuda nan cumpra instrumentonan manera piano, drum, blokfluit, guitara, etc. pa asina e muchanan por siña con pa toca nan.
“Nos tin hopi muchanan cu talento,” asina Chela Lesire-Profet di Imeldahof a bisa. Nan tin muchanan cu ta gusta toca algun instrumento y tambe tin algun di nan cu ta canta bon tambe.
Nan ta percura pa e muchanan sigui un bida normal, kiermen cu nan por bay scol, tambe pa nan bay ya sea les di lantamento, bowling, etc. Tur esaki cu e meta cu nan por desaroya nan mes y socialisa cu e mundo cu tin pafo di Imeldahof.
Sra. Lesire-Profet a pone na conocemento di nos comunidad cu mirando cu nos ta na porta di e temporada di fiesta di luna di december, Imeldahof ta bin cu nan proyecto di Big Brother & Big Sister.
Pa medio di proyecto aki nan ta percura pa e muchanan por haya chens cu por tin un famia boluntario cu por busca nan regularmente pa comparti cu nan, te hasta pa duna nan conseho. Pa e mucha sinti e ambiente con pa anda cu otro. E proyecto aki ta encera cu e mucha ta bay cas di un famia of conoci pa pasa hunto cu nan dunado e amor y atencion cu nan merece.
Sra. Lesire-Profet a laga sa cu tambe nan tin palabracion cu e mayornan di e mucha pa nan bin bishita nan yiunan, y Imeldahof ta stimula esey tambe. “E ta bon pa e mucha pa su desaroyo cu e por tin e contact cu su mayornan. Mucha ta keda cu nan mester di nan mayornan,” el a bisa. Sinembargo tanten e muchanan ta den Imeldahof nan ta cay bou responsabilidad di e fundacion aki.
Nan ta stimula e contact mayornan y yiu pa nan drecha y pa mañan e mucha por bay den seno di su famia bek. Aunke e muchanan ta wordo saca di nan ambiente familiar pa algun motibo, pero esey no kiermen cu nan ta kita nan for di nan mayornan. Nan tin derecho pa tin contacto cu nan mayornan.
Imeldahof tin 62 aña di existencia. Nan tin diferente cas pa atende cu e muchanan. Nan ta brinda nan un hogar, stabilidad y reglanan of structuranan. Tin muchanan cu ta keda mita temporada na cas y mita na Imeldahof. Pero tambe tin un grupo di mucha cu ta keda mas largo. Sra. Lesire-Profet a bisa cu tin muchanan cu ta keda 2 pa 3 aña cerca nan. Sinembargo e mucha homber por keda maximo te cu 14 aña y mucha muhe te 18 aña.
Breakfast walk
Secretaria di Imeldahof, Jennyree Bovea a informa cu nan ta organisa e di 14 edicion di nan breakfast walk, dia 26 di november awor pa 6’or di mainta. E inscripcion tin un balor di 12,50 florin cu ta inclui e breakfast y T-shirt. E ta un caminata di 5 km y e fondo lo wordo destina pa cumpra algun instrumento musical, aunke nan tin algun instrumentonan caba.
E aña e topico di nan breakfast walk ta: Nos muchanan, nos responsabilidad. Nan ta invita comunidad den general pa join cu nan den e caminata aki. Bo por bin cu famianan, amigonan y coleganan pa participa di e breakfast walk aki. Tur hende interesa por yama libremente na tel: 587-6085 of cel: 593-7815 pa mas informacion.
