Cantidad di morto pa coronavirus na Italia a surpasa esun na China ayera, como tambe cantidad di infeccion.
Italia, cu un poblacion di 60 miyon, a registra al menos 3,405 morto, alrededor di 150 mas cu na China – un pais cu un poblacion 20 biaha mas grandi.
Italia a alcansa e cifra grave riba e mesun dia cu Wuhan, e ciudad Chines unda coronavirus a aparece pa prome biaha tres luna atras, a registra ningun infeccion nobo, un señal cu e lockdown extremo di e pais comunista tabata efectivo den combati expansion.
Diahuebs, un team di Cruz Cora Chines bishitando a critica e fayo di Italianonan pa pone nan mes den cuarentena adecuadamente y tuma e lockdown nacional na serio.
Autoridadnan di Salud a cita un variedad di motibo pa e cantidad halto di caso na Italia, clave entre nan su poblacion grandi di hende di edad avansa, kende ta particularmente suceptible na complicacionnan serio di e virus, maske tambe a mira casonan severo cerca hende jong. Italia tin e segundo poblacion mas bieu di mundo, y e gran mayoria di su mortonan – 87% – tabatin edad mas di 70 aña.
Durante un bishita na Milan, hopi afecta, Sun Shuopeng, cabesante di delegacion di Cruz Cora Chines yudando pa conseha Italia, a bisa cu e tabata den shock pa mira tanto hende canando rond, usando transporte publico, comiendo pafo y den fiesta den hotel. “Na e momento aki nos mester stop tur actividad economico y mester stop mobilidad di hende”, el a bisa. “Tur hende mester keda cas den cuarentena.”
Alberto Villani, cabesante di proteccion civil Italiano, a defende sistema di cuido di salud Italiano mientras el a anuncia e cifra nobo di morto, insistiendo cu lockdown di e pais ta un modelo pa otro pais.
Tras di Italia, Spaña ta e pais Europeo mas afecta, y na Madrid, un hotel di 4 strea a cuminsa opera como hospital improvisa pa pashent di coronavirus. Asociacion di Negoshi di Hotel di Madrid a bisa cu a pone 40 hotel cu camber pa 9mil persona den servicio di region di Madrid, unda tin mita di e alrededor di 17mil caso na Spaña.
