Directora di e fundacion Guia Mi, Anneke Nicolaas-Lucas, ta consciente cu a pesar cu nan a celebra nan 65 aña di existencia, hopi hende den nos comunidad no ta conoce e fundacion aki. Esey ta bin cu e fundacion ta duna guia obligatorio a base di decision di Hues. Door di esaki, nan no ta bay mucho den luz publico, ya cu e guia cu nan ta duna ta bini for di hues.
Nan responsabilidad ta grandi, ya cu e fundacion ta trata cu muchanan. Pa nan ta importante pa e muchanan aki por desaroya den bon manera. “Un manera sano cu nan haya amor, atencion y cu nan por desaroya pa bay scol cu un bon alimentacion,” el a declara na Bon Dia Aruba.
Fundacion Guia Mi por wordo nombra como tutor di un mucha door di Hues. Den e caso aki, ta trata di muchanan victima di maltrato, neglisha of/y abusa. Den un situacion asina, un trahado social ta guia e famia y e mucha. Den esaki e interes di e menor di edad ta keda central semper.
Actualmente e fundacion aki ta brindando guia na 150 mucha y hobencitonan. E edad ta bay di cero te cu 18 aña y e ta lamenta cu e cantidad di muchanan cu e fundacion mester duna guia ta aumenta. Nan mester a haya extra personal den cuadro di e social crisis plan.
E ta spera cu como fundacion nan lo sigui duna guia pa e muchanan cu mester di dje, pero e ta spera cu e cantidad por bira menos.
Sinembargo, pa futuro e ta mira cu e fundacion tin hopi trabou nan dilanti. Pero Nicolaas-Lucas ta confia cu fundacion Guia Mi tin un bon team y nan ta traha den un ambiente agradabel y yen di motivacion pa yuda e muchanan y nan famia.
