Tiramento di klapchi pa ricibi aña nobo ta un tradicion di hopi aña y uno cu hopi Arubiano ta admira, pero e biaha aki ciudadanonan a comenta cu e cambio di aña di 2024 pa 2025 tabatin un cantidad significantemente mas chikito di kimamento di klapchi.
Ta custumber cu tur temporada di fin di aña Aruba ta ser rondona cu e luz-, zonido- y efectonan di klapchi. E cambio di aña aki hopi ciudadano a comenta riba rednan social cu nan a tuma nota di e cantidad di klapchi cu tabatin tabata significantemente menos compara cu añanan anterior.
Manera ta conoci, e aña aki e cantidad di container di klapchi cu a yega Aruba tambe tabata menos compara cu añanan anterior y un aspecto cu e decepciona hopi ciudadano ta cu no tabatin benta di pagara na hopi luga.
Experto di explosivo, Rubin Ponson a indica anteriormente na e noticiero Noticia Cla cu e aña aki e ocho container cu a bin cu klapchi a bin for di Merca y no for di China, cual ta e motibo principal pakico no tin pagara e aña aki ya cu na Merca no ta bende pagara.
E containernan cu a yega for di Merca a yega cu algun variacion di klapchi y a reparti esaki hunto cu cargamento di klapchi cu e resta di aña pasa. Segun e experto a splica na e noticiero e cantidad no ta hopi.
El a indica cu si compara e cantidad di klapchi cu e bin aña aki cu añanan anterior e ta hopi tiki mes y hasta el a menciona cu por papia di scarsedad di klapchi na Aruba. El a señala cu pa loke ta trata pagara, tin algun cu a resta di aña pasa, masha poco, pero esakinan a ser bendi caba y en realidad pa publico no ta bay tin benta di pagara.
Ponson a splica cu e puntonan d benta di klapchi a baha tambe e aña aki. El a indica cu compara cu añanan anterior, caminda tabatin por ehempel 65 punto di benta di klapchi, e aña aki nan a ricibi inicialmente peticion pa 48 punto di benta, di cual varios a cay afo na caminda. Motibo pa esaki, el a sigui splica, ta cu na ultimo ora nan ta cambia di opinion y ta dicidi pa no bende klapchi mas, of nan ta bende otro caminda, of ta uni cu otro punto di benta pa bende klapchi hunto.
Un di e motibonan principal pakico no tabatin tanto kimamento di klapchi e aña aki, hopi ciudadano a comenta, tabata e prijs di e klapchi. Hopi a señala cu e prijsnan di klapchi tabata casi impagabel.
Pa hopi esaki tabata decepcionante pasobra kimamento di klapchi a bira parti di e tradicion di fin di aña na Aruba. Pero di otro banda algun ciudadano tabata contento cu no tabatin tanto klapchi pasobra mascotanan ta sufri cu esaki.
Esey ta otro aspecto cu tambe a resalta den e comentarionan riba rednan social. Hopi persona ta consciente di e daño y molester cu klapchi por causa pa e mascotanan, esaki por ta un factor cu a contribui cu ciudadanonan a scoge pa no cumpra ni kima klapchi.
Tur aña den temporada di kimamento di klapchi lastimamente hopi mascota ta huy for di nan hogar. Klapchi tin consecuencia grave pa e mascotanan. Animalitonan ta tende scucha mas skerpi y nan ta tende mas leu cu hende. Nan por tende hasta e klapchi cu ta wordo tira den e un otro bario, cu por ta pa un persona no ta asina duidelijk, pero pa e bestianan e ta zona cla.
E zonido di e klapchinan por causa trauma cerca e mascota. Pa un bestia, e trauma no ta djis un anochi, e por keda cu efecto di e stress cu por causa cu e ta keda cu miedo pa zonidonan duro pa hopi tempo.
E aña aki no ta un excepcion y riba Facebook hopi persona a reporta nan mascota(nan) perdi y otronan tabata publica bestianan cu nan a encontra cu tabata mustra perdi. Aunke no ta specifica si e bestia a huy pa motibo di klapchi, fin di aña ta e temporada cu mas bestia ta perde pa motibo di nan miedo di klapchi.
Oranjestad, Santa Cruz, Noord, Paradera, San Nicolas y Dakota, ta, entre otro, algun di e barionan caminda a reporta mascotanan perdi. Usuarionan ta publica e potretnan di e mascotanan perdi den speransa cu lo por logra debolbe e mascota na su doño mas lihe posibel.
