Awe e countdown a cuminsa core pa paga te mañan e impuesto di vehiculo di motor; pero e cantidad di hende cu ainda no a cumpli cu e pago aki ta grandi. E ta wordo refleha den e rij largo cu ta wordo forma ya sea na oficina di Servicio di Impuesto Aruba (SIA) na Camacuri of den nan postnan situa den oficina di gobierno di diferente districto.

Gobierno pa medio di su ministerio di Financia a dicidi di bin cu cambio den e ley aki, ya cu anualmente e cantidad di hende cu no tabata cumpli debidamente cu e obligacion aki ta halto. Di un banda nan a cambia e fecha di 15 di februari como deadline pa paga e belasting aki y pas’e pa fin di januari. Tambe nan a introduci e instrumento di boet di hasta 100% di e balor di e impuesto aki pa esun cu no ta cumpli na tempo cu ne.

Pero na ultimo ora nan a dicidi di pospone e deadline pa 15 di februari, mirando e avalancha di hende cu a presenta den nan oficina te hasta hende a bira malo. Sinembargo e problema ta sigui mesun cos. Ayera for di tempran cantidad di hende a campa entre otro dilanti di edificio di SIA na Camacuri pa bay paga su number di auto ya sea mita aña of full aña ya cu e cambio di ley a elimina e posibilidad di paga den kwartaal.

Clientenan disgusta
Bon Dia Aruba a yega di papia cu algun cliente di SIA cu a yega di expresa nan disgusto. Un di nan a expresa cu el a para den rij algo prome cu 7or di mainta y ora cu el a drenta paden pa haya number, a transcuri caba  1 ora y mei; y na final ora cu el a wordo atendi 11or y mey di merdia a bati caba. Kiermen full un mainta pa paga number di auto.

Otro persona  tabata masha rabia pasobra ora cu su beurt a yega pa paga su number di auto a confronta e problema cu e no por paga su number di auto; pasobra e tin cu paga pa otro number di auto cu no a wordo uza. “Aki nan kier cobra mi e number cu mi no a uza. E aña pasa cu mi a bin paga esun otro, nan a bisa mi cu mi no mester worry cu esey. Si bo no uz’e bo no tin nodo di pag’e.” E ciudadano aki tabata masha indigna y ta considera e echo aki un abuso; ya cu e no ta haya husto cu mester paga pa un plachi number cu no a wordo uza y nan ta practicamente fors’e di pag’e, sino e no por paga esun cu  e si a haci uzo di dje.

Mal servicio
E clientenan a keha riba e mal servicio pa atende publico debidamente y  deficiente. Un di nan despues cu el a warda casi cuater ora pa su beurt pa paga e number di auto di su hefe di trabou, el a haya como contesta cu e mester bin cu e dos plachinan di e numbernan di auto cu su hefe di trabou tin riba su nomber; pa e por paga esun cu e kier paga. Ademas el a haya dos formulario pa yena nan y bin cu e dos plachinan di auto. Ora cu el a bin bek cu tur cos, e funcionario a bis’e cu tambe mester bin cu e ID di e persona cu ta doño di e auto, prome cu e por paga. “Nos ta papiando di mal servicio, pasobra si bo sa cu mi tin basta oranan wardando mi beurt, logicamente si tin cosnan pendiente cu mester cumpli, please duna mi tur informacion completo.”

E keho di e ciudadanonan tabata diferente indole y nan mal contento tambe; y nan no ta compronde dicon gobierno a bin cu e sistema di sticker si e problema di tur aña ta sigui mescos. Bon Dia Aruba a bishita e edificio nobo di MFA y otro facilidadnan cu SIA tin pa ofrece nan servicio. Ora cu nan a yega nan ta wordo informa cu pa dia nan ta entrega alrededor di 125 number so. Mientras cu na Bestuurkantoor na San Nicolas, un hende so tabata atende cu e cantidad di clientenan. Pues si bo no a paga bo number di auto ainda y ta madruga mester bay pa haya un number, lagando otro compromiso personal of di trabou un banda, dificilmente por ta logra cumpli cu e compromiso aki.

Mientrastanto e countdown ta sigui core pa cumpli cu ley te cu mañan; y e posibilidad di haya un boet pisa ta grandi.