Den su resumen diario riba e desaroyonan di e pandemia di Covid-19 na Aruba, Departamento di Salubridad Publico DVG a informa cu lamentablemente un persona mas a fayece pa motibo di e malesa causa pa e virus SARS-CoV-2.
Cu e fayecido aki, e total di fayecido na Aruba pa e malesa di Covid-19 a aumenta na 167.
Ademas, DVG a informa cu segun su resumen di ayera, 28 persona a recupera, y a registra un total di 17 caso nobo di Covid-19, di cual seis no ta residente.
E cifranan aki ta representa un tasa di positividad entre nos residentenan di dies porciento.
E cantidad di caso activo ayera tabata 161.
Datonan di DVG ta ilustra casonan nobo di Covid-19 cu un averahe semanal di 16 caso pa dia, y un averahe di tasa di positividad semanal di 9 porciento pa dia.
Actualmente na Aruba tin 21 persona hospitalisa pa Covid-19. Di esakinan, seis ta hospitalisa den Unidad di Cuido Intensivo (ICU) y riba piso general tin 15 persona. Ademas, na Colombia actualmente tin 19 pashent di Aruba den ICU.
