Segun resumen di cifranan relaciona cu e pandemia di Covid-19 na Aruba, Departamento di Salubridad Publico DVG a informa cu diasabra e cantidad di morto pa e malesa a aumenta na 59.
Den su resumen diario di diasabra, DVG a informa: “E cantidad di fayecido relaciona cu Covid-19 a aumenta na 59 persona. Condolencia na famia di e fayecido. Edad promedio di esnan cu a fayece ta 64 aña.”
Igualmente, DVG ayera a duna su resumen diario, y den esaki no a registra aumento den e cantidad di morto. DVG a informa cu 61 persona a recupera di Covid-19, mientras cu a registra un total di 22 caso nobo di Covid-19, di cual 19 ta residente y tres no ta residente.
E cantidad total di test cu a ehecuta na e diferente localidadnan na Aruba, entre otro laboratorio di hospital, laboratorionan priva y aeropuerto ta 580 test. Tasa di positividad (‘Postivity rate’) entre nos residentenan ta 11%.
Cantidad di caso activo pa ayera tabata 341 caso.
Di su banda, hospital Dr. Horacio Oduber a informa cu tin un total di 18 persona interna na hospital. Di esakina, 10 ta den Unidad di Cuido Intensivo (ICU) y ocho ta isola riba unidad general di covid. Edad promedio di esnan ingresa pa extra cuido ta 64 aña.
