Bon Dia Aruba a topa cu un articulo cu ta papia di embaraso hubenil na Merca. Segun e articulo ta bisa, maske cu hobennan ta birando sexualmente activo mas trempan, numbernan di embaraso hubenil a baha drasticamente den ultimo 10 pa 15 añanan.
Un estudio haci pa e gobierno Mericano publica ayera diahuebs, ta splica cu hobennan ta mas consciente pa uza anti conceptivo, y ta mas educa desde un edad mas jong. Segun Joyce Abma, investigado di e Centro Nacional di Estadistica di salud na Merca, e number a baha ki 50%. Bill Albert, vocero di un fundacion nacional pa preveni embaraso hubenil y embaraso no planea ta bisa “Adultonan ora nan ta pensa ariba cultura sexual den hobennan, no ta mira nada mas cu un liña fini sin enfoca ariba dje. Awe hobennan ta birando generalmente mas consciente ora ta trata di sex, al contrario di cu locual mayornan ta pensa.”
Bon Dia Aruba a tuma contacto cu directora ehecutivo di Famia Planea, Evelyn Yarzagaray cu algun pregunta. Sra. Yarzagaray ta bisa nos cu embaraso hubenil aki na Aruba aña pa aña ta menos y ta birando menos alarmante. Famia Planea ta enfoca mas ariba e parti preventivo y na 2016 a cera cu 5000 hoben cu nan a alcansa cu nan programa “CSE program (comprehensive sex education)”. E programa aki ta wordo haci na e scolnan di Aruba. El a comenta cu 70% di e hobennan cu Famia Planea e alcansa via e programa na scol, ta hobennan cu lo bay bek na famia planea pa bira miembro pa uza un of otro metodo anti conceptivo, cual ta un detaye hopi importante. Pa Famia Planea, scol ta hopi importante como fuente di educacion sexual. Nan ta haya cu e samenwerking cu dokternan di cas tambe ta sumamente importante.
Na 2013 tabata e ultimo estudio cu a wordo haci hunto cu universidad di Aruba. Mescos cu e articulo di Merca ta bisa, akinan na Aruba tambe muchanan ta birando sexualmente activo mas trempan. E estudio aki a mustra cu trata di ta muchanan entre 14 cu 15 aña di edad. Riba educacion na cas, sra. Yarzagaray ta bisa cu e servicio cu nan ta ofrece ta confidencial, y ta ofrece consulta priva. Hopi biaha mirando cu nan ta pidi e cliente informacion confidencial, eynan ta evalua e situacion di cada pashent con e ta na cas. Primordialmente no ta piki ariba kico por a bay robes na cas pero ta haci e mayor esfuerso pa yuda e cliente na e momento ey. Tur cos depende di con habri cada pashent ta pa papia cu nan. Mayoria pashent ta acerca Famia Planea pa ayudo cu nan salud sexual, manera metodonan anticonceptivo y problemanan di pareha.
