Portal noticiero El Nacional di Republica Dominicana a reporta cu mas di 4,300 Dominicano cu tabata biba ilegalmente den exterior, a bolbe boluntariamente nan pais den ultimo 15 luna, segun datonan estadistico obteni na aeropuerto di Las Americas.
Segun e relato di El Nacional, informenan oficial ta indica cu mas di 60 porciento di e Dominicanonan en cuestion ta hende muhe cu a bolbe nan pais natal for di Panama, Venezuela, Colombia, Mexico, Argentina, Chile, Honduras, Aruba y Corsou, Spaña, Francia, Italia y Alemania, entre otro nacion.
A bisa cu hopi Dominicano cu a bolbe for di exterior tabata dedica na trabao domestico, trabao na cafeteria, salon di beyesa, centronan nocturno y benta di producto y diverso articulo riba caya di e nacionnan unda nan tabata biba ilegalmente.
Pa loke ta hende homber, informenan obteni na e aeropuerto di Las Americas, unda nan a drenta e pais, ta indica cu hopi di nan tabata dedica na trabao agricola, di construccion, den panaderia, barber shop y otro tipo di negoshi.
A bisa cu hopi di e Dominicanonan tabatin hasta cinco y seis aña bibando ilegalmente na e nacionnan menciona, y cu nan decision pa bolbe boluntariamente na e pais tabata fruto di e dificultadnan cu tabata pasando na e paisnan exterior.
Informenan ta revela cu hopi di nan, pa por bolbe nan pais, mester a busca sosten economico di nan famia na Republica Dominicana, pidi ayudo na amigonan of hasta den consuladonan cu ta representa e Dominicanonan na e paisnan ey.
A menciona tambe cu aña pasa a bolbe nan pais mas di 4mil Dominicano, y cu mas di 200 a yega den e prome lunanan di aña 2025, mayoria di nan for di Panama, Venezuela y Corsou.
