Den cuadro di conmemoracion di Dia Mundial di Siguridad y Salud Laboral, dos fondo importante pa e clase trahado administra dor di Banco di Seguro Social (SVb) ta: E fondo di seguro di malesa y fondo di seguro di accidente. Durante e dos ultimo aña, e fondo di seguro di malesa a rapport un deficit; mientras cu e fondo di seguro di accidente a registra un surplus.

Segun informacion suministra pa vocero di Banco di Seguro Social (SVb), Cherryldine Buckley, pa aña 2017 e fondo di malesa a duna un resultado di 0,1 miyon florin, pues un deficit. Mientras cu e fondo di accidente tin un resultado di 4,2 miyon florin, pues un surplus. Den caso di e deficit pa e fondo di malesa, e fondo di accidente su surplus ta yuda cubri e deficit di e fondo di malesa. Esaki tabata e caso pa aña 2018 tambe.

Na 2019, SVb ta premira cu un deficit pa e seguro di malesa, cual ta bay wordo cubri pa e surplus di seguro di accidente. Si ta compara aña 2017 cu 2018 por bisa cu e gastonan di seguro di malesa a subi, door cu e cantidad di dianan di AO a subi (pues mas a duna mas dia di AO). Esaki ta haci cu e entrada no ta suficiente pa cubri e gastonan total di e fondo, cual ta resulta den un deficit cu lo wordo cubri pa e seguro di accidente.

Segun Buckley, e sector laboral cu mas accidente ta wordo rapport na pia di trabou tin di haber cu e contratistanan cu ta traha pafo. Pero e trahadonan cu ta traha paden, kiermen riba e parti administrativo, ta relaciona cu hendenan cu tin dolor di lomba, nek, brasa, etc. Segun vocero di SVb, e tipo di molester aki ta wordo registra mas frecuente riba e trahadonan di siglo 21, cu ta traha dilanti computer.

Cubrimento di SVb
Igualmente el a indica cu si un trahado ta sufri di un malesa manera cancer, cu ta limita su persona di traha regularmente, e cobertura di SVb ta pa dos aña. Pero si un persona ta sufri un accidente na pia di trabou, e cobertura aki ta mas largo. Den principio, e cobertura lo ta te ora cu e trahado por recupera y por traha bek. Cada caso ta wordo evalua apart. E prome aña, e cobertura di e salario ta 100% for di e fondo di seguro di accidente administra pa SVb. Tambe esaki ta depende di e categoria di trabou cu e persona ta realisa. Igualmente su relacion y comunicacion cu su doño di trabou. Ya cu e trahadonan por yega na areglo di por bay traha un par di ora pa dia.