Diasabra anochi durante e prome parada di Carnaval 69, Fakkel Optocht (Parada di Flambeu), Korps Politie Aruba (KPA) tabata activo manteniendo ordo durante parada, deteniendo e personanan cu no kier a sigui ordo di polis, cu tabata causa molester pa otro y personanan cu a causa problema y bringa.
Den un comunicado publica ariba nan website oficial, KPA a informa cu diferente detencion a tuma luga durante y despues di Fakkel Optocht.
Segun e comunicado, KPA tabatin un total di 180 polis riba caya durante Fakkel Optocht cu tabata consist di e unidadnan di polis uniforma, recherche , Mobiele Eenheid, Team di Aresto, personal administrativo, K-9, studiante Scol di Polis y CEA.
Parada a sali oficialmente pa 7:58 anochi for di Aruba Entertainmetn Center, pa 00:54 marduga e cabez di e parada a yega edificio ex-DOW y pa 02:37 marduga a stop e musica di e lastlap.
KPA ta remarca cu pa e aña aki e detencionnan durante parada a subi drasticamente compara cu e ultimo parada di flambeau cu a tuma luga. Den total tabatin 19 detencion e aña aki cu a trata di casonan di buracheria, bringamento, resistencia y no sigui orden di polis, como tambe posesion di droga.
Den aña 2020, e ultimo aña cu Aruba a celebra carnaval, durante parada di flambeu tabatin 5 detencion en total.
Despues di parada tambe unidad motorisa a tene su control ariba velocidad y despues ariba maneha bao influencia di alcohol. E controlnan a tuma luga na diferente puntonan strategico rond di Aruba.
KPA a controla mas o menos 60 auto y a reparti 24 boet pa velocidad halto y 3 pa maneha auto bao influencia di alcohol.
E comunicado ta remarca cu hopi persona a haci uzo di amigo Didi depsues di parada, locual ta un bon noticia y ta spera cu eskai lo continua asina pa evita accidentnan di trafico grave.
Mester agrega cu durante parada KPA a ehecuta listramento preventivo como parti ‘Faya Bo Haya’. E listramento preventivo ta realcion mayoria biaha cu buskeda di arma di candela, droga, persona of grupo di persona cu ta actua sospechoso entre otro.
