Team di expertonan di coronavirus di gobierno actualmente ta evaluando varios opcion pa reduci e transmision di Covid-19, pero e cifranan manera nan ta awo ta rekeri precaucion, segun prome minister Mark Rutte a bis den su conferencia di prensa semanal ayera.
Instituto di Salubridad Publico RIVM a registra seis mil test positivo di coronavirus den e 24 ora te cu 10am ayera, hopi mas cu e averahe di 5mil registra den e siman anterior. Den total, RIVM a ricibi 5,935 registracion di coronavirus nobo, un aumento di mas di 300 riba diahuebs y enfatisando mas ainda cu e tendencia di reduccion a parce di stop.
E tendencia ta similar na mayoria di Europa, Rutte a bisa.
Contestando si Hulanda ta considerando introduci control di frontera pa periodo festivo, Rutte a bisa: “Nos recomendacion fuerte ta pa no bay den exterior a menos cu ta estrictamente necesario.”
Durante anochi, 189 persona a ser admiti den hospital, 36 mas cu diahuebs, y 28 persona a bay den Unidad di Cuido Intensivo. Den total, 1,625 persona ta hospitalisa actualmente cu coronavirus di cual 473 ta den ICU. E cantidad di morto pa coronavirus ta den averahe di 51 pa dia durante ultimo shete dia, compara cu 63 pa dia den e periodo di shete dia anterior.
Sinembargo, cifranan publica pa agencia di estadistica nacional CBS ta indica cu mas hende a muri di efectonan di coronavirus cu e cifranan oficial ta mustra. Siman pasa, CBS a registra 3,450 morto, alrededor di 400 mas cu lo por a spera pa e temporada. CBS ta bis cu mas di dies mil persona e berdad a muri di coronavirus te cu fin di juni, cuatro mil mas cu e cifranan di RIVM ta indica.
