Mientras cu comunidad tabata celebra dianan di Pasco y Aña Nobo, e cantidad di casonan activo di Covid-19 na nos isla a surpasa 300.
Segun resumen di Departamento di Salubridad Publico DVG pa loke ta trata e cifranan di Covid-19 na Aruba, ayera a registra un total di 32 caso nobo, di cual 31 ta residente y 1 no ta residente. Esaki, hunto cu e hecho cu ningun persona a recupera, a haci cu e cantidad di caso activo rapidamente a yega na 306 caso.
Tabata apenas dia 30 di december (diaranson siman pasa) cu Bon Dia Aruba a reporta cu Aruba tabatin mas di 200 caso positivo, y menos di un siman despues, ya e total a yega 306 caso activo.
E tasa di positividad (‘positivity rate’) a keda na 21 porciento ayera, y DVG a informa cu a realisa 872 test total. Afortunadamente no a conoce mas caso di morto pa Covid-19, pa loke e total a keda na 49.
Di su banda, hospital Dr. Horacio Oduber a informa cu nan tin un total di 13 persona interna. Di esakinan, 4 ta den Unidad di Cuido Intesivo y 9 ta isola den piso general di Covid.
Prolongacion di toque de queda
“Considerando con e virus ta plamando cu un “positivity rate” demasiado halto, cantidad di testnan den ultimo dianan cu tabata hopi abou y awor por tuma nota cu e cantidad di testnan a aumenta, sinembargo esaki, combina cu e positivity rate halto, ta pone cu e medidanan tin cu worda prolonga,” DVG a publica riba su pagina di Facebook. “Pues e Toque de Queda ta wordo extendi cu 4 dia mas; dianan 4, 5, 6 y 7 di Jjanuari 2021. Ta urgi comunidad henter di Aruba pa tuma nota di extension di fechanan di Toque de Queda cual ta di 11or di anochi pa 5 or di mainta riba cada un di e dianan cu a keda anuncia. E orario di ciere ta keda 10 or di anochi. Crisis Team lo sigui monitorea e desaroyo di e pandemia di cerca pa tuma e pasonan necesario na tempo.”
