E noticia di e dos ultimo asesinato na Aruba cu a tuma luga den menos di un siman a consterna comunidad, unda algun hende riba rednan social ta puntra si matamento a bira algo normal riba nos isla.

Manera a bira conoci, dia 4 di december ultimo un hoben di 31 aña di edad bira victima di asesinato despues di un bringamento na area di Palm Beach na districto di Noord. Cuerpo di Polis a informa cu nan a mester pidi refuerso di mas patruya policial door cu e situacion a bira caotico na e momento ey.

Ministerio Publico conhuntamente cu Cuerpo Policial di Aruba a ofrece un conferencia di prensa extraordinario diadomingo ultimo 6or di atardi pa asina trece dilanti informacion y claridad.

Alto Comisario di Polis, Ramon Arnhem a extende palabranan di condolencia na famia, amistad y conocirnan di e victima di asesinato y na mesun momento a sigura cu Cuerpo Policial, hunto Ministerio Publico lo traha duro pa trece dilanti husticia e culpabel di e caso lamentabel aki.

Pero esaki no ta e unico caso. Menos cu un siman atras, na Tanki di Savaneta, dia 30 di november a tuma luga un tiramento den cual un hoben di 19 aña di edad a perde su bida. Relaciona cu e caso aki a haci varios detencion. Apenas tres dia despues a tuma luga un otro tiamento den e districto di Noord, zona turistico, na unda un otro homber a perde su bida.

Alto Comisario a indica cu investigacion ta andando pa ambos caso y no por a contesta preguntanan relaciona cu esey. Alabes el a manda mensahe bisando cu Cuerpo Policial y Ministerio Publico lo reacciona adecuadamente ariba situacionnan grave y esey ta locual a pasa den ambos caso. El a remarca cu den e dos caso aki Cuerpo Policial a logra haci detencion den menos di un ora.

Nan a menciona strategianan cu a bin implementando pa reduci insiguridad na Aruba como por ehemplo entregamento di arma di candela cu segun Procurador General, Bote ter Steege a menciona, te diadomingo ultimo a wordo entrega 5 arma di candela y mas di 300 municion.

Tambe ta importante recorda e prome caso cu a tuma luga dia 18 di maart ultimo unda e curpa di un homber a wordo bandona na haltura di Santana di Zeewijk, den e caso aki 4 dia despues Recherche di San Nicolas a logra detene un homber di 22 aña y un muhe di 33 aña relaciona cu e caso aki unda despues a bira conoci cu tabata un asesinato pa motibonan pasional y e sospechosonan a wordo sentencia.

Pero e pregunta ta sigui keda di parti di comunidad, strategianan cu ta bezig implementa lo baha criminalidad? Con nos hende local y turistanan cu ta nos pilar economico por sigui disfruta di nos beachnan y clubnan nocturno sabiendo cu cualkier persona por tene un arma di candela cune y por us’e na cualkier momento? Ta preguntanan cu instancianan y minister di Husticia cu te ainda no a duna un comentario riba loke a sucede mester tene na cuenta.