Cantidad alarmante atrobe di accident den fin di siman: Comunidad preocupa pa falta di seguridad den trafico

Durante fin di siman por a tuma nota di un cantidad significante di accident di trafico cu a tuma luga. Varios di nan tabata envolve chauffeurnan cu tabata tras di stuur bao di influencia di alcohol, algun di nan tabata envolve menornan di edad of velocidad halto. A pesar cu den luna di maart a lansa un campaña nacional, “Trafico Sigur”, pa eleva seguridad den trafico, e cantidad di accidente cu ta tuma luga ainda ta preocupante.

Aruba a registra un cantidad basta halto di accidente den fin di siman. Un di nan tabata un accidente pisa cu a sucede na e crusada di Sero Pita. E crusada aki ta conoci caba pa ta peligroso y unda varios accidente fuerte a yega di tuma luga.

Diasabra atardi tabata e caso unda un vehiculo a subi riba e caminda di preferencia sin duna preferencia y un auto blanco tabata core, riba un velocidad basta halto, riba caminda aki y no a logra break na tempo y a dal den e otro vehiculo. Un accidente basta grave y na unda un menor di edad cu tabata envolvi den e accidente a sufri heridanan basta grave.

Diabierna atardi tambe na e crusada di Weng Kee Bar y Restaurant na Piedra Plat a sucede otro accident. Atrobe un auto a sali sin duna preferencia y a ocasiona e accident. Ambos chauffeur a resulta herida den e accident aki.

Diabierna merdia a sucede un accidente cu tambe tabata envolve un baby. Den e caso aki, e chauffeur tabata coriendo riba un velocidad halto, y bao influencia y cu un baby den auto. E chauffeur a baha caminda y a dal den e cura di un cas, cu e resultado cu un persona a resulta levemente herida. Polis a detene e chauffeur di biaha pa core bao influencia.

Den fin di siman tambe a tuma luga e famoso careda Ronde van Aruba. Durante e actividad aki, coredornan ta riba caya den oranan di marduga y semper autoridadnan ta haci yamado na tur automobilista pa core cu cautela ya cu tin coredornan riba e camindanan principal. Ademas di otro auto- ciclistanan cu ta compaña e coredornan.

Diasabra marduga un accidente a tuma luga cu a laga dos persona herida. E caso aki tabata trata di un accidente caminda un chauffeur cu tabata tras di stuur bao di influencia di alcohol a dal fuertemente tras di dos ciclista cu tabata compañando un di e participantenan den Ronde van Aruba. Un accidente basta pisa cu a laga e dos ciclistanan cu heridanan basta fuerte.

Ariba rednan social un cantidad di persona ta vocifera nan preocupacion pa e cantidad di accidentnan cu ta tuma luga. Varios ta expresa cu nan tin “miedo di subi riba caya cu auto pasobra hendenan iresponsable ta core pa loco y no ta tene cuenta cu nan por coasion accident y perhudica bida di otro.”

Mientras otronan ta haci yamado na e autoridadnan concerni pa tuma accionnan mas drastico pa asina eleva seguridad den trafico.

A pesar di e anuncio di e campaña di Gobierno di Aruba pa eleva seguridad den trafico y reduci accidentnan cu ta tuma luga, e cantidad di accident cu ta sucede ainda ta preocupante. Automobilistanan iresponsable ainda no ta tene cuenta cu core bao influencia of cu velocidad halto por tin consecuencianan grave.

Den luna di februari minister di Husticia y Asuntonan Social, Rocco Tjon, a anuncia e inicio di e campaña “Trafico Sigur”. E mandatario remarca cu e cadena hudicial ta bay pone tur nan forsa hunto pa percura pa eleva seguridad den trafico a traves di e campaña nacional aki cu ta enfoca riba diferente aspecto. E campaña a cuminsa oficialmente dia 1 di maart y tin como meta mehora seguridad den trafico, reduci e accidentnan y salba bida.

Minister Tjon a señala cu na aña 2022 Aruba a conoce 7.341 incidente pa loke ta trata trafico y den tur e incidentenan aki tabatin un total di 13.069 persona envolvi.

Na december aña pasa gobierno a inicia e proceso caminda nan a acerca diferente compania pa duna nan oferta pa yuda e cadena hudicial ehecuta e proyecto aki. E compania ganador ta bay duna conseho na gobierno durante un aña largo pa asina por ehecuta e proyecto aki.

Apart di esaki un comision a wordo institui, comision trafico sigur y den e comision aki tin representacion di Cuerpo Policial, e compania ganador, Ministerio Publico, Ministerio di Husticia y Asuntonan Social y tambe di e companianan di seguro pa atende cu tur aspecto cu tin di haber cu e fenomeno aki.

Minister Tjon a indica cu e campaña trafico sigur ta bay enfoca riba educacion y conscientisacion, pa educa y ademas preveni accidentnan den trafico. E enfoke lo ta riba velocidad halto, core bao di influencia y distraccion den auto, manera por ehemplo uso di celular.

Pero apart di enfoca ariba e parti di conscientisacion y prevencion, e mandatario a resalta cu nan ta bay percura tambe pa e parti di controlnan tuma luga.

El a splica cu hunto cu e proyecto aki y hunto cu Cuerpo Policial a dicidi cu ta bay emiti un kalender interno pa loke ta trata tur e diferente control di trafico cu lo bay keda tuma luga na un manera structural.

Nan a tuma e decision tambe pa amplia e capacidad pa loke ta trata e Unidad Motorisa di Cuerpo Policial locual ta encera cu nan ta bay haya tur persona cu tin mester pa tur e motornan cu e unidad ta dispone di dje tambe por wordo usa pa garantisa mas seguridad den trafico.

Minister Tjon a menciona cu tabatin, e momento ey, 300 caso pendiente di 2022 y 2023 pa loke ta trata specificamente core bao di influencia. El a indica cu nan a reuni cu presidente di Corte Comun y a dicidi cu ta bay percura pa mas personal pa corte pa haal in e casonan cu tin pendiente.

Banda di esaki gobierno a lansa un website, traficosigur.aw. Riba e website aki ciudadanonan ta haya tur informacion disponibel y e ta bay conta tambe cu un seccion interactivo caminda tur persona por haci nan pregunta y ricibi nan contesta pa duna contenido real na e parti di educa y conscientisa y preveni accidentnan di tuma luga.

A pesar di esfuerso di no solamente gobierno, pero tambe di fundacionnan manera entre otro FADA y Fundacion Zinnia, cu ta traha henter aña pa eleva conscientisacion den comunidad pa automobilistanan core responsablemente, e preocupacion den comunidad ta keda bira mas grandi pa loke ta e fenomeno aki.