CHICAGO – E cantante a bay den corte dialuna cu su uniform oraño di prizon, pa asina tende di su caso di abuso sexual, despues di a keda e fin di siman den prizon, su confidante a purba paga 100mil dollar pa sak’e afo.
Kelly ta un cantante di R&B ganado di Grammy, un di e miho artista di su tempo. E ta wordo acusa di 10 caso di abuso sexual, en cual ta envolvi 4 victima, tres di esaki tabata menor di edad.
Abogado Michael Avenatti, kende ta representa dos victima di e cantante, a bisa cu nan lo duna un di dos video cu lo mustra Kelly abusando di un menor. Avenatti a bisa cu recientemente a duna fiscal e evidencia.
Un mucha muhe di 16 aña, kende a atende na Kelly su huicio di pornografia infantil na 2008, a haya su autografo den corte. Despues, e cantante a invita e mucha muhe aki na su cas na Olympia Fields, unda cu nan e tene relacion sexual varios biaha, segun e documento, el a duna e mucha muhe un bofta, chok’e y scupi riba e mucha muhe.
Na 1998 tambe tabatin otro caso di un mucha muhe di 16 aña, kende a tene relacion sexual pa un aña segun e documento. Na 2003 un trahado di un salon di cabey a bisa e fiscal cu el a pensa lo bay drecha e cantante su cabey. Kelly a forsa e muhe aki pa tene relacion sexual pero e muhe, di 24 aña di edad, a logra aparta, segun e documento, y Kelly a scupi na su cara entre otro.
Fiscal tambe tin acceso na video mustrando e cantante teniendo relacion sexual cu un mucha di 14 aña di edad. E testigo a duna e tape na autoridadnan y logra identifica e mucha muhe. Segun e video, e mucha tabata keda bisa su edad.
Segun abogado di Kelly, e cantante no a forsa ningun hende pa tene relacion sexual. “E ta un strea di rock, e no mester pidi pa sex.” Hues a ordena pa kita su paspoort, cual ta nifica e mester cancela tur su concierto binidero.
E cantante ta ser lastra pa decada di acusacion cu el a abusa di mucha muhe menor y muhe. Pa tene nan manera esclavo. Kelly ta nenga tur mal conducta sexual. Kelly por wordo sentencia pa 15 aña den prizon.
