CHICAGO – E strea di musica R&B a cuminsa yora, cu rabia el a lanta y bisa cu el a wordo ‘asesina’, durante su prome entrevista despues cu el a wordo acusa di abuso sexual. Yamando tur esunnan cu acusa e cantante manera gañando, y cu hende ta su tras pa placa.
E ta bisa cu e nunca a abusa sexualmente di un muhe of controla nan bida. E cantante, kende tin 52 aña, a wordo acusa siman pasa na Chicago di abusa sexualmente di 4 muhe na aña 1998, incluyendo 3 mucha muhe menor di edad.
Segun Kelly e ta bisa den entrevista cu ‘tur ta gaña’ agregando cu el a wordo asesina. El a yega na un punto durante entrevista, cu yen di rabia a lanta y su stem a cuminsa kibra, gritando ‘no ta ami, mi no a haci e cosnan ey’ na yoramento, ‘mi ta pleitando pa mi bida’.
Den entrevista, e cantante a bisa cu el a yega di haci hopi cosnan malo ora ta trata di muhe, pero el a pidi pordon. E ta continua nenga di haci algo contra nan boluntad of forsa nan. E contesta cu el a duna, ora nan entrevistado a puntr’e si e gusta muhe mas jong cune, el a bisa cu e ta un homber cu stima tur muhe, reconociendo cu el a yega di ta den relacion cu dos muhe mas hoben cune.
Como parti di e caso cu ta andando, Kelly tin prohibi di tene contacto cu muhenan menor di 18 aña. El a wordo declara inocente di 10 cargo di abuso sexual agrava.
