(EFE) – Cannabis medicinal ta habriendo su paso cu via hudicial na Brazil, debi na sentencianan cu ta protege e creacion di plantacion grandi cu ta suministra azeta di marihuana na miles di pashent.
Un di e mayor plantacion di e pais, cu 600.000 vierkant meter a lanta na Paty do Alferes, ubica cerca di Rio de Janeiro, un hacienda cu ta suministra azetanan deriva di ‘cannabis sativa’ na mas di 3.000 pashent di malesanan como epilepsia, parkinson, alzheimer y autismo.
E haciendo aki cu ta produci casi 2.000 boter di azeta pa luna, ta un trabou compleho di Asociacion di Apoyo pa Investigacion di Pashentnan di Cannabis Medicinal (Apepi), un ONG cu na februari ultimo a ricibi un permiso hudicial pa planta cannabis.
“Nos trabou ta pendiente di un resolucion hudicial. Nos lo tin un proteccion huridico definitivo ora lo wordo husga na Corte Supremo y esey ta bay tarda” abogado Margarete Brito, fundado di Apepi a bisa.
Brito a haya e idea di crea e asociacion hunto cu su casa, e diseñador Marcos Langenbach, despues cu a descubri cu marihuana tabata yuda controla convulsion cu tabata causa e epilepsia di su yiu Sofia.
Esey tabata e motibo pa cuminsa un bataya hudicial pa haya cannabis legalmente, a pesar di e “dificultadnan grandi” cu nan a haya pa via di e topico delicado aki na Brazil.
Un otro solucion por ta un proyecto di ley cu a keda den un lachi na Congreso y cu su futuro por depende di esun cu lo resulta eligi como presidente dia 30 di october.
E presidente actual Jair Bolsonaro, ken ta busca su reeleccion ta nenga di legalisa droga, aunke ta di uso medicinal, y a adelanta cu ta bay elimina e proyecto di ley cu a yama “un porkeria”.
A pesar di falta di reglamentacion, autoridadnan sanitario a inclui marihuana den e lista di planta medicinal na 2017 y for di e momento ey a autorisa e uso di medicamentonan deriva di e yerba.
